موزه‌خانا زاخۆ.. پێنگاڤه‌ك ژبۆ پاراستن و سه‌پاندنا كه‌له‌پور و شارستانیه‌تا كوردى
ل هه‌ر وه‌ڵاته‌كێ جیهانێ و هه‌ر باژێره‌كێ, پاراستنا پارچێن كه‌ڤنار و كه‌له‌پورى, دبیته جهێ سه‌پاندنا شارستانییه‌ت و دیروكا كه‌ڤنار یا وى جهى, و ئه‌ڤێ چه‌ندێ, موحه‌مه‌د ئه‌حمه‌د رێڤه‌به‌رێ شوینه‌وار و كه‌له‌پورێ ئیدارا سه‌ربه‌خۆ یا زاخۆ بۆ مالپه‌رێ فه‌رمى یێ پارتى دیموكراتى كوردستان دگوتنێن خۆدا دیاركر:
"ڤه‌كرنا موزه‌خانا زاخۆ گرنگییه‌ك هه‌ره مه‌زن هه‌یه بۆ هه‌رێما كوردستانێ ب گشتى و ئیدارا سه‌ربه‌خۆ یا زاخۆ ب تایبه‌تى, چونكه كه‌ڤنترین پارچێن شوینه‌وارى و كه‌له‌پورى بۆ خه‌لكێ ناڤخوى و بیانى نمایش دكه‌ت, و ب ڤێ چه‌ندێ شارستانیه‌ت و دیروكا كه‌ڤنارا باژێر و ملله‌تێ مه دسه‌پینیت هه‌روه‌سا مێژوویا كه‌ڤن یا هه‌بوونا باژێرێ مه بۆ هه‌مى وه‌ڵاتێن بیانى دسه‌لمینیت"
موزه‌خانا زاخۆ ژدوو به‌شان پێكدهێت, به‌شه‌كێ شوینه‌وارى و به‌شه‌كێ كه‌له‌پووریه, و پتر ژ300 پارچه و كه‌رسته تێدا هاتینه پاراستن و پێشچاڤكرن, و ئه‌و پارچه پێكدهێن ژبه‌رێن گه‌له‌ك كه‌ڤن وه‌كو به‌رێ ئوپسیدن بۆ برینێ و به‌رێ بازلت بۆ هیركرنێ و به‌رێن گومبه‌تا میر عه‌لى خان به‌گ و پارچێن شوینه‌وارى یێن ل هه‌لكولینێن گرێ دێره‌بوون یا شوینه‌وارى هاتین دیتن, و په‌یكه‌رێ خوداوه‌ندا دایك, هه‌روه‌سا جه‌رك و ئامانێن لێنانێ یێن سه‌رده‌مێ میتانی و ئاشوری و گریكى,
و ژپارچێن گرنگ ژى (دار جگاره) باسك یا بابێ روحى یێ نه‌ته‌روێ كورد مه‌لا موسته‌فایێ بارزانى یێ نه‌مر و هنده‌ك ژجل و به‌رگێن كوردى و ئامیرێن چاندنێ و به‌فریك و خه‌فك و ئامان و شالوك و باگوردان و ملهێب و هه‌ڤچار و هنده‌ك ژپارچه چه‌كێن كه‌ڤن وه‌كو برنو و سیسته‌م و ره‌شوكه و گه‌له‌ك پارچێن دى.
ل دویف گوتنا موحه‌مه‌د ئه‌حمه‌دى, به‌رییا نوكه ئه‌ڤ پارچێن شوینه‌وارى ل رێڤه‌به‌رییا شوینه‌وار و كه‌له‌پورێ ئیدارا سه‌به‌خۆ یا زاخۆ هاتبوونه پاراستن, و هنده‌ك پارچه ژى ل ده‌ف دوو هاوڵاتیێن زاخۆ ب ناڤێ موحه‌مه‌د كوچه‌ر و شه‌وكه‌ت هه‌ڤند هاتبوونه پاراستن و ب ڤه‌كرنا مه‌زه‌خانێ ئه‌وان ئه‌و پارچێن ل ده‌ڤ خۆ پاراستین پێشكێشى موزه‌خانێ كرن.
كه‌ڤنترین پارچا هاتى نمایشكرن ل موزه‌خانێ به‌رێ ئوپسیدنه كو بۆ به‌رى 10 هزار ساڵان به‌رى زاینى دزڤریت.
موزه‌خانا زاخۆ ل رێكه‌فتى 15ى هه‌یڤا 2 ساڵا 2024ێ ژلایێ گوهدار شێخۆ سه‌رپه‌رشتێ ئیدارا سه‌ربه‌خۆ یا زاخۆ ڤه و ل سه‌ر راسپاردێن سه‌روك مه‌سرور بارزانى سه‌روكێ حكومه‌تا هه‌رێما كوردستانێ هاته ڤه‌كرن, و ئه‌ڤ پرۆژه وه‌كو ئێك ژپرۆژه‌یێن هه‌ره دیارێن زاخۆ دهێته ده‌ستنیشانكرن.
رۆژانه هه‌ر ژده‌مژمێر 9ى سپێدێ و هه‌تا 4ى ئێڤارى ڤه‌كرییه و رێڤه‌به‌رییا پولیسێن زاخۆ به‌رده‌وام ب ئه‌رگێ پاراستنا موزه‌خانێ رادبن, و دنوكه دا چوونا ژوور بۆ موزه‌خانێ بۆ هه‌ر هاوڵاتییه‌كێ 1000 دینارێن عیراقى نه و بۆ قۆتابیێن هه‌مى قۆناغێن خواندنێ ب بێ به‌رامبه‌ره.
سه‌جا شێرزاد-دهۆك
