ب هه‌لكه‌فتا سه‌ر ساڵا نوى ل پارێزگه‌ها دهۆكێ چاڵاكیێن جودا دهێنه ئه‌نجامدان
ب تنێ دئه‌ڤ ساڵه دا و هه‌ر ژ1ى هه‌یڤا 1 ساڵا 2023ێ و هه‌تا 30ى هه‌یڤا 11 ساڵا 2023ێ, پتر ژ2 ملیون و 400 هزار كه‌سان سه‌ره‌دانا پارێزگه‌ها دهۆكێ كرییه و ب تنێ دهه‌یڤا 12 دا پێشبینییا هاتنا هزاره‌هان گه‌شتیارێن دى دهێته كرن.
ل پارێزگه‌ها دهۆكێ ب گشتى و ل هه‌مى هه‌لكه‌فتێن گرێدایی خه‌لكێ وێ ب هه‌مى ئاین و ته‌خێن خۆ یێن جودا ڤه, ئاهه‌نگێن جودا و ژێهاتى ژلایێ رێڤه‌به‌رییا پارێزگه‌ها دهۆكێ ب هه‌ماهه‌نگى دگه‌ل رێڤه‌به‌رییا گه‌شت و گوزارێ و رێڤه‌به‌رییا ره‌وشه‌نبیرى دهێنه گێران, تێدا كارتێكرنه‌كا ئه‌رێنى یا مه‌زن ل سه‌ر كه‌رتێن گه‌شتیارى ب گشتى و ئابورى ب تایبه‌تى دهێته كرن.
شه‌ڤانێن سه‌رساڵا نوى ژى بێ به‌هر نه‌بووینه, كو تێدا چه‌ندین ئاهه‌نگ ل جه و ده‌ڤه‌رێن جودا یێن پارێزگه‌ها دهۆكێ بهێنه گێران, ل ده‌مه‌كێ ل پارێزگه‌ها دهۆكێ و ئیدارا سه‌ربه‌خۆ یا زاخۆ مه‌زنترین ئاهه‌نگێن سه‌رێ ساڵێ ل سه‌ر ئاستێ هه‌رێما كوردستانێ و عیراقێ هاتینه گێران و هه‌ر ژ1ى هه‌یڤا 12 ده‌سپێكرینه و هه‌تا 31ى هه‌یڤا 12 ژى دێ به‌رده‌وام بن,
ل پارێزگه‌ها دهۆكێ ل فاملى مول و هه‌ر ژ1ى هه‌یڤا 12 ده‌ست ب ڤه‌كرنا بازارێ سه‌رێ ساڵێ بۆ 20 كومپانیێن تایبه‌ت هاتییه كرن, تێدا ئاهه‌نگێن جودا و چاڵاكى هاتینه كرن و بریاره هه‌تا شه‌ڤا سه‌رێ ساڵێ ژى به‌رده‌وام بیت.
دیسان ل دهۆك موڵ و هه‌ر ژ21ى هه‌یڤا 12 ده‌ست ب ڤه‌كرنا بازاره‌كێ دى یێ سه‌رێ ساڵێ بۆ 30 كومپانیێن تایبه‌ت هاتییه كرن تێدا ژى ئاهه‌نگێن جودا و چاڵاكى هاتینه كرن و بریاره هه‌تا شه‌ڤا سه‌رێ ساڵێ ژى به‌رده‌وام بیت.
و ل پاركا نه‌وروز(پاركا گشتى) یا ل سه‌نته‌رێ بازارێ دهۆكێ و هه‌ر ژ25ى هه‌یڤا 12 بازاره‌ك بۆ 20 كومپانیێن دى هاتییه ڤه‌كرن تێدا چه‌ندین برگێن جودا هاتینه دانان ژخیڤه‌تێن هونه‌رێ شێوه‌كارى و هونه‌ر و سترانێن فلكلورى دگه‌ل برگێن پرسیار و خه‌لات ب سپونسه‌رییا كومپانیێن به‌ژدار.
و ل ئیدارا سەربەخۆ یا زاخۆ و هەر ژ1ی هەیڤا 12 ژئەڤ ساڵە دەست ب گێرانا ئاهەنگێن گشتی ل هەمبێزا پرا دەلال هاتییە کرن ب هاتنا چەندین هونەرمەندان کو ب تنێ دئێک شەڤ دا پتر ژ15 هزار کەسان سەرەدانا ئاهەنگێ کرییە.
دیسان ئاهه‌نگ و چاڵاكیێن جودا دێ ل هه‌مى هوتێل و موتێل و خوارنگه‌ه و كافى و هولێن شه‌هیانان هه‌بن تێدا ده‌رفه‌ته‌كا مه‌زن یا كارى ژبۆ هه‌نه‌رمه‌ندان و جهێن پێشوازیێ لێ دكه‌ن هه‌بیت, كو دێ بیته ئه‌گه‌رێ لڤینه‌كا باش یا گه‌شتیارى و ئابورى بۆ ده‌ڤه‌رێ.
ب گور وان ئامارێن, شه‌مال هرورى, په‌یڤدارێ رێڤه‌به‌رییا گشتى یا گه‌شت و گوزارێ ل پارێزگه‌ها دهۆكێ تایبه‌ت بۆ مالپه‌رێ فه‌رمى یێ پارتى دیموكراتى كوردستانى داینه دیاركرن, ب تنێ دئه‌ڤ ساڵه دا و هه‌ر ژ1ى هه‌یڤا 1 ساڵا 2023ێ و هه‌تا 30ى هه‌یڤا 11 ساڵا 2023ێ, پتر ژ2 ملیون و 400 هزار كه‌سان سه‌ره‌دانا پارێزگه‌ها دهۆكێ كرییه و ب تنێ دهه‌یڤا 12 دا پێشبینییا هاتنا هزاره‌هان گه‌شتیارێن دى دهێته كرن ب هه‌بوونا ڤان جوره ئاهه‌نگێن جورا و جور ل جهێن جودا یێن پارێزگه‌ها دهۆكێ.
دیسان پ.د.خه‌یرى عه‌لى ئوسۆ تایبه‌ت بۆ مالپه‌رێ فه‌رمى یێ پارتى دیموكراتى كوردستان به‌حس ل پلانێن نوى یێن سه‌رێ ساڵێ و درێژییا ساڵا بهێت یا 2024ێ دكه‌ت و دبێژیت:
"دپلانێن مه یێن سه‌ره‌كى دایه, زێده‌بارى رێژه‌یا مه‌زن یا كارمه‌ندێن كه‌رتێ گه‌شتیارى یێن ناڤخوى, زێده‌كرنا پتر كارمه‌ندێن ناڤخوییه, دیسان به‌رده‌وامى دان ب بهێزكرنا بكارئینانا زمانێ كوردى زمانێ دایك ل هه‌مى جهێن گه‌شتیارى ژبۆ ناساندنا جهان, هه‌روه‌سا به‌رده‌وامى دان ب بهێزكرنا مالپه‌رێ فه‌رمى یێن كه‌رتێ گه‌شتیارى یێ پارێزگه‌ها دهۆكێ ل تورێن جڤاكى ژبۆ به‌ڵاڤكرنا هه‌مى چاڵاكییان داكو خه‌لك و راگه‌هاندن پێ ئاگه‌ه بیت, و سه‌باره‌ت پرۆژه‌یێن نوى بۆ ئێكه‌م جار ل پارێزگه‌ها دهۆكێ ئه‌لبوما پارێزگه‌ها دهۆكێ دێ هێته دروستكرن تێدا وێنه‌یێن هه‌مى جهێن گه‌شتیارى دێ هێنه دیاركرن, و رێبه‌رێن گه‌شتیارى یێن ساڵا نوى ژى دنوكه دا دقوناغا چاپكرنێ دانه, ل ده‌مه‌كێ دێ به‌رده‌وامى ب هه‌مى چاڵاكى و ئاهه‌نگ و پێشانگه‌هان هێته كرن ب شێوازێن هه‌ره باشتر ژساڵێن بورى."
دیسان گوت: "كومبوونه‌كا به‌رفره‌ه ل ساڵا 2023ێ ژلایێ مه‌ڤه هاتییه ئه‌نجامدان دگه‌ل چه‌ندین كومپانیێن گه‌شتیارى یێن عیراقێ و روسی و یونانى ژبۆ ئینانا گه‌شتیاران بۆ پارێزگه‌ها دهۆكێ"
ل پارێزگه‌ها دهۆكێ ژپشتى سه‌رهلدانێ 7 قه‌زا دگه‌ل ئیدارا سه‌ربه‌خۆ یا زاخۆ هه‌نه زێده‌بارى 24 ناحى و پترى 914 گوندێن ئاڤا, و دنوكه دا زێده‌ترى 110 ئوتێل و موتێل و شوقه‌یێن رائێخستى هه‌نه ئانكو دئێك شه‌ڤ دا پارێزگه‌ها دهۆكێ شیانێن حه‌واندنا زێده‌ترى 16 هزار گه‌شتیاران هه‌یه و ئه‌گه‌ر هات و رێژه‌یا گه‌شتیاران دئێك شه‌ڤ دا زێده‌تر لێ هات رێڤه‌به‌رییا گشتى یا گه‌شت و گوزارێ جهێن یه‌ده‌ك هه‌نه ژبۆ حه‌واندنێ, و ب گور دیاركرنا رێڤه‌به‌رییا گشتى یا گه‌شت و گوزارى ل پارێزگه‌ها دهۆكێ هه‌مى ئه‌ڤ جهێن گه‌شتیارى یێن ل پارێزگه‌ها دهۆكێ ب هاتنا هه‌لكه‌فتان ئازادن بۆ خه‌ملاندنا جهێن خۆ چونكه كارتێكرنه‌كا ئه‌رێنى ل كه‌رتێ گه‌شت و گوزارێ دكه‌ت.
ل پارێزگه‌ها دهۆكێ رێژه‌یا گه‌شتیارى به‌رامبه‌ر ب ساڵأ 2021ێ گه‌له‌ك زێده‌بوویه, ل ده‌مه‌كێ ل ساڵا 2021ێ و ل هه‌ر 12 هه‌یڤان 1 ملیون و 500 هزار گه‌شتیاران سه‌ره‌دانا پارێزگه‌ها دهۆكێ كرییه, دیسان ل ساڵا 2022ێ ل هه‌ر 12 هه‌یڤان 2 ملیون و 500 هزار گه‌شتیاران سه‌ره‌دانا پارێزگه‌ها دهۆكێ كرییه.
سەجا شێرزاد-دهۆک
