بڕیاری پەرلەمانی ئەورووپا بۆ پێدانی دۆخی تایبەت بە كەركووك، لە لایەن كوردەوە ڕەت كرایەوە

بڕیارەكەی پەرلەمانی ئەورووپا لە وەڵامی سكاڵای توركمانەكانی كەركووك بووە. پێدانی دۆخی تایبەت بە كەركووك لە ڕوانگەی توركمانەكانەوە، پێدانی دەستەڵاتی زیاتر بە پارێزگاكە و بەڕێوەنەچوونی هەڵبژاردنە لەو پارێزگایەدا.

سەرۆكی گشتیی بەرەی توركمانی لە كەركووك ئەرشەد ساڵحی دەڵێ كە پەرلەمانی ئەورووپا لە بڕیارە نوێیەكەی خۆیدا داوا دەكات حكوومەتی عێراق ماف و ئاساییشی توركمانەكان بپارێزێت. هەروەها داوا دەكات دەستەڵاتی زیاتر بە پارێزگاكانی عێراق بدرێ‌، بە مەرجێك دۆخێكی تایبەت بە كەركووك و بەغدا بدرێت.

جێگری سەرۆكی ئەنجوومەنی پارێزگای كەركووك ڕێبوار تاڵەبانی پاراستنی ماف و ئاساییشی توركمانەكان لە لایەن حكوومەتی بەغداوە بە مافی توركمانەكان دەزانێ و جەخت دەكاتەوە كە كوردیش پشتگیریی لێ دەكات، بەڵام ئەو لەگەڵ بڕگەكەی دیكەی بڕیارەكەدا نییە.

ڕێبوار تاڵەبانی دەڵێ "ئێمە پابەندین بە دەستووری عێراق و بە پێی دەستووریش دەبێ هەڵبژاردن لە كەركووك بكرێت، بۆیە بڕیارەكەی پەرلەمانی ئەورووپا دژی ئەو بڕگەیەی دەستووری وڵاتە و ئێمە ڕەتی دەكەینەوە."

دوایین تەقینەوەی تیرۆریستی كە پرسەیەكی توركمانەكانی لە شارۆچكەی خورماتوو كردە ئامانج، كوژرانی 43 هاووڵاتیی توركمان و برینداربوونی 117ـی دیكەی لێ كەوتەوە. بە گوتەی ئەرشەد ساڵحی ئەمە وای كرد توركمانەكان پەنا بۆ پەرلەمانی ئەورووپا بەرن.