مەزنترین پرۆژێ دارچاندنێ ل دهۆک دەسپێکر
ئەڤرۆ رۆژا پێنچشەمبی رێکەفتی ١٦ی چریا دووێ ٢٠٢٣ێ، ب چاڤدێری و ئامادەبوونا بەرێز “د.عەلی تەتەر” پارێزگارێ دهۆکێ و جێگرێ بالیۆزێ کونسلێ هۆلەندا ل عیراقێ و رێکخراوا کار یا نیڤدەولەتی ILo و رێڤەبەریێن پەیوەندیدار هەوەیا کەسککرنا سەد دونەمێن ئەردی ل سەنتەرێ باژێرێ دهۆکێ دەست پێکر.
ژبەر کو ژینگەها جیهانێ رۆژ بۆ رۆژێ پیسترە و ژینگەها هەرێما کوردستانێ بەشەک ژوێ ژینگەهێ یە، ساڵ بۆ سالێ حکومەتا هەرێما کوردستانێ رێکارێن باشتر و پێشکەفتی تر ژبۆ پاراستنا ژینگەهێ ل هەرێمێ ئەنجام ددەت، و ل سەر ڤێ رێبازێ ئەڤرۆ هەوەیا دارچاندنێ ل سەنتەرێ پارێزگەها دهۆکێ (جادا ئالوکا) نێزیک پیشەسازییا دهۆک هاتە ئەنجامدان کو دهێتە هژمارتن وەک مەزنترین هەوەیا دارچاندنێ ل پارێزگەها دهۆکێ و عیراقێ.
پرۆژە دێ ل سەر ١٠٠ دونەمێن ئەردی هێتە ئەنجامدان تێدا ١٥ هزار دار دێ هێنە چاندن، ل سەر دوو قوناغان ل قوناغا دەسپێکی ب تنێ ٥٠ دونەم ب ٦ هزار داران دێ هێنە چاندن، و بۆ ئێکەم جار ل سەر ئاستێ پارێزگەها دهۆکێ بەرمایکێن کارگەها گلێشێ ئەوا ل کواشێ(دهۆک) وەکو زبل(پەین) بۆ بهێزکرنا داروباری هاتە بکارئینان، و هەر ئەڤرۆ ل دەسپێکا هەوێ دەهان کەس ژتەخ و چینێن جودا یێن پارێزگەها دهۆکێ بەژداری دپرۆسا چاندنێ دا کر و ژوان ژی کۆمەلا نابینا و کێم بینایێن دهۆکێ بوون.
ب گور گوتنا دلشاد عەبدولرەحمان رێڤەبەرێ ژینگەها پارێزگەها دهۆکێ کو تایبەت بۆ مالپەرێ فەرمی یێ پارتی دیموکراتی کوردستان دیارکری: “ئەڤ پرۆژە دێ بیتە ئەگەرێ پاقژتر کرنا ژینگەها پارێزگەها دهۆکێ ب گشتی و بەرامبەر وێ چەندێ ساخلەمییا خەلکێ دێ باشتر لێ هێت و کارتێکرنەکا ئەرێنی دێ ل هەمی سێکتەرێن ژیانێ کەت”
هەروەسا ب گور گوتنا موحەمەد تاهر بریفکانی شارەزایێ ژینگەهێ کو تایبەت بۆ مالپەرێ فەرمی یێ پارت دیموکراتی کوردستان دیارکری: “ل سەنتەرێ پارێزگەها دهۆکێ رێژا کەسکاتیێ ب ئامارێن هویر و دووپاتکری نینن لێ ئەگەر ئەو ١٠٠ دونەم هاتنە چاندن لەوانەیە رێژا کەسکاتیێ ل دهۆکێ بگەهیتە ١٣٪”.
بەرییا چەند رۆژان ژبەر دانانا پێنج کامیرێن چاڤدێرییا لەزاتییا ترومبێلان ل سەنتەرێ پارێزگەها دهۆکێ، پێنج دار ژلایێ سەروکاتییا باژێرڤانییا پارێزگەها دهۆک و ب شێوازەک فەرمی هاتنە برین، لێ ژبەر خەمخورییا خەلکێ پارێزگەها دهۆک وهوشیاربوونا وان ل سەر بابەتێن گرێدایی ژینگەهێ نەرازیبوومەک ژلایێ کومەکا گەنج و چالاکڤان و رێکخراوێن پەیوەندیدار هاتە کرن ل تورێن کومەڵایەتی و مالپەرێن راگەهاندنێ، لێ ئەڤ چەندە نە بوویە جهێ دل گرانییا کارگێرییا دهۆک و لایەنێن بەرپرس بەلکو کونگرەیەک رۆژنامەڤانی ژلایێ رێڤەبەرییا هاتن و چوونا پارێزگەها دهۆکێ دگەل سەروکاتییا باژێرڤانییا دهۆک هاتە کرن تێدا هاتە دیارکرن کو ب تنێ ئەو دار هاتن برین یێن راستەوخۆ کەفتینە بەرامبەر چاڤکێ کامیرێن چاڤدێریێ و ئەو دار ژبۆ پاراستنا گیانێ شوفێران هاتینە برین بۆ هندێ شوفێر کامیرێن چاڤدێریێ ب شێوازەک باشتر ل سەر جادەیان ببینن دیسان وێنەیێن ترومبێلێن سەرپێچکار باشتر بهێنە گرتن، و ژبۆ ڤێ چەندێ د.عەلی تەتەر، پارێزگارێ دهوکێ دکونگرێ ئەڤرۆ یێ هەوەیا چاندنێ دا گوت “گەلەک دلخوش بوم دەمێ من دیتی گەنجێن مە ژبەر برینا داران هاتینە دەنگ هیڤیدارم دبەردەوام بن و ژینگەهـ و وەلاتێ خو بپارێزن”
سەجا شێرزاد-دهۆک
