ئامیرێن چاندنێ ب قست بۆ جۆتیاران دێ هێنە دابینکرن

دهۆک-KDP.info- رێڤەبەرێ گشتی یێ چاندنێ ل پارێزگەها دهۆکێ دیار کر کو کۆمپانیەکا کەرتێ تایبەت بەرهەڤیا خوە دیارکریە کو ئامیرێن چاندنێ ب قست بۆ جۆتیارێن هەرێما کوردستانێ دابین بکەت و بۆ ڤێ مەرەمێ ژی رێڤەبەریا گشتی یا چاندنێ ل پارێزگەها دهۆکێ بەرهەڤیێن باش کرینە و جۆتیار ئاگەهدارکرینە.

ئەحمەد جەمیل، رێڤەبەرێ گشتی یێ چاندنێ ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو ب پشتەڤانیا حکومەتا هەرێما کوردستانێ ل دووڤ پلانەکا وەزارەتا چاندن و ژێدەرێن ئاڤێ بڕیارە ئامیرێن چاندنێ بشێوەیێ قست ل سەر جۆتیاران بھێنە بەلاڤکرن و گۆت: "هەر جۆتیارەکێ حەز هەبیت ئامیرەکێ چاندنێ ب شێوەیێ قست بۆ خوە بکریت دڤێت داخوازەکێ پێشکێشی رێڤەبەری و هۆبێن چاندنێ یێن سنوورێ قەزا خوە بکەت، ئەڤە ددەمەکی دایە رێڤەبەریا گشتی یا چاندنێ جۆتیار ل دۆر ڤێ چەندێ ئاگەهدارکرینە".

ناڤهاتی ئاماژە دا وێ چەندێ کو دەمێ جۆتیار بۆ داخوازکرنا ڤان ئامیرێن چاندنێ ب شێوەیێ قست سەرەدانا رێڤەبەری و هوبێن چاندنێ دکەن ل وێرێ دێ هەمی پێزانین ل دۆر کرینا ڤان ئامیران و شێوەیی دانا قستان پێ هێنەدان و ئەو داخوازیێن وان دێ بۆ رێڤەبەریا گشتی یا چاندنێ ل پارێزگەها دهۆکێ دێ هێنە هنارتن و دووڤ دا دێ بۆ وەزارەتا چاندن و ژێدەرێن ئاڤێ هێنە هنارتن.

ژ ئالیەکێ دی ڤە رێڤەبەرێ گشتی یێ چاندنێ ل پارێزگەها دهۆکێ خویا کر د بەردەوامیا وێ پشتەڤانیا ل جۆتیاران دهێتەکرن ب مەرەما گرنگیدانێ ب بەرهەمێ ناڤخۆ ل رۆژێن بوری هۆبا چاندنێ ل قەسرۆکێ ب هەڤکاریا ریكخراوا AVSI یا ئیتالى 555 سەرێن پەزی ل سەر 15 جۆتیاران بەلاڤکرن و هەر جۆتیارەکی 37 سەرێن پەزی وەرگرتن.

رێوار محەمەد رەشید