فیسته‌ڤالا كه‌لتۆرى و به‌رهه‌مێن خۆمالى ل ئاكرێ دێ ده‌ست پێ كه‌ت
دهۆك –KDP.info- ب هه‌لكه‌فتا بیره‌وه‌ریێن ئادار و نه‌ورۆزێ فیسته‌ڤالا كه‌لتۆرى و به‌رهه‌مێن خۆمالى یێن ده‌ڤه‌رێ دێ ل رۆژا 17/3/2023 ل گۆره‌پانا سه‌رێ گرى ل ئاكرێ ژ لایێ رێڤه‌به‌ریا گه‌شتوگۆزارا قه‌زا ئاكرێ ڤه ب هه‌ماهه‌نگى ل گه‌ل ژماره‌كا سازیێن په‌یوه‌ندیدار هێته ئه‌نجامدان و بۆ ده‌مێ سێ رۆژان دێ یا به‌رده‌وام بیت.
__2023_03_13_h18m45s30__HK.jpg)
ڤه‌هێل فه‌همى، به‌رپرسێ ڕاگه‌هاندنێ ل رێڤه‌به‌ریا گه‌شتوگۆزارا قه‌زا ئاكرێ بۆ ماڵپه‌رێ فه‌رمیێ پارتى دیموكراتى كوردستان دیار كر كو ب مه‌ره‌ما گرنگیدانێ ب به‌رهه‌مێ ناڤخۆ یێ جۆتیارێن ده‌ڤه‌را ئاكرێ و به‌رچاڤاكرنا كه‌لتۆرێ مه یێ كورده‌وارى بۆ به‌ره‌بابێ ڤى سه‌رده‌مى و گه‌شتیارێن سه‌ره‌دانا قه‌زا ئاكرێ دكه‌ن رێڤه‌به‌ریا گه‌شتوگۆزارا قه‌زا ئاكرێ ب هه‌ماهه‌نگى ل گه‌ل ژماره‌كا سازیێن په‌یوه‌ندیدار به‌رهه‌ڤیێن باش بۆ ئه‌نجامدانا فیسته‌ڤالا كه‌لتۆرى و به‌رهه‌مێن خۆمالى كرینه و گۆت: "د ڤێ فیسته‌ڤالێ دا دێ كه‌لتۆر و به‌رهه‌مێن خۆمالى یێن جۆتیارێن سنوورێ قه‌زا ئاكرێ و خوارنێن كورده‌وارى یێن تایبه‌ت ب ده‌ڤه‌را ئاكرێ ڤه هێنه نیشادان، سه‌ره‌رایى ڤێ چه‌ندێ چه‌ندین برگێن هونه‌رى دێ هێنه گێڕان و ژماره‌كا چالاكیێن جۆراوجۆر یێن گرێدایى ب نه‌ورۆزا ئاكرێ ژى ڤه دێ د ناڤ ڤێ فیسته‌ڤالێ دا هێنه ئه‌نجامدان".
ناڤهاتى ئاماژه دا وێ چه‌ندێ كو وان دڤێت ب رێیا ڤێ فیسته‌ڤالێ پشته‌ڤانیێ ل به‌رهه‌مێ جۆتیارێن ده‌ڤه‌رێ بكه‌ن ژ به‌ر ڤێ چه‌ندێ ژى ئه‌و جهێ د ناڤ ڤێ فیسته‌ڤالێ دا بۆ جۆتیاران هاتیه دابینكرن دێ یێ بێ به‌رامبه‌ر بیت و هه‌مى خه‌لكێ هه‌رێما كوردستانێ و گه‌شتیارێن سه‌ره‌دانا قه‌زا ئاكرێ دكه‌ن د دخوازكرینه كو سه‌ره‌دانا جهێ فیسته‌ڤالێ بكه‌ن.
رێوار محه‌مه‌د ره‌شید
