رۆژا جیھانی یا زمانێ دایکێ ل دھۆکێ ھاتە ساخکرن
دھۆک-KDP.info- رۆژا جیھانی یا زمانێ دایکێ ئەڤرۆ رۆژا دووشەمبی ٢١/٢/٢٠٢٢ ب ئامادەبوونا چەندین زمانزان و ماموستایێن زانکۆیێ ژ لایێ رێڤەبەریا گشتی یا رەوشەنبیری و ھونەری ل پارێزگەھا دھۆکێ ب ھەماھەنگی دگەل کۆلیژا زمانان ل زانکۆیا نەورۆز ب ئەنجامدانا دیدارەکێ ل دۆر زمانی ھاتە ساخکرن.
حەسەن فەتاح، پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو رۆژا جیھانی یا زمانێ دایکێ ئەڤرۆ ب ئەنجامدانا دیدارەکێ کو ژ دوو پەنەلان پێک دھات ھاتە ساخکرن، د پەنەلێ ئێکێ دا (د.رەشید فندی) بەحسێ رەوشا زمانێ کوردی د ئەڤرۆ دا کر، د ھەمان پەنەل دا (پ.ە.د.ھودا عەبدولقادر) بەحسێ زمانێ دایکێ ژ روویێ زانستی ڤە کر، د پەنەلێ دووێ یێ ھەمان دیدار دا (پ.ە.د.شەوکەت سندی) بەحسێ زمانی وەکو ژیان و پێناسا گەلان کر، ھەروەسا (پ.د.عەبدولوەھاب خالد موسا)ی ژی بەحسێ زمان و نەتەوەیی کر و گۆت: "مەرەما مە ژ ساخکرنا ڤێ رۆژێ ئازادیا زمانێ دایکێ بۆ ژ بەر کو ھەر نەتەوە و مللەت و پێکھاتەکی مافێ ھەی ب زمانێ دایکێ باخڤیت و بخوینیت و بنڤیسیت، وەکو گەلێ کورد ژی بۆ دەمێ چەندین سالانە زمانێ مە ھەتا رادەیەکی ھاتیە داگیرکرن ژ بەر ڤێ چەندێ ژی دڤێت ئەم پتر خوە ل زمانێ خوە یێ دایک بکەینە خودان داکو ھەر ب زیندی بمینت، ژ بەر کو د رۆژێن سەخت دا مە زمانێ خوە پاراستیە".
ناڤھاتی خویا کر کو سال بۆ سالێ زمانێ کوردی یێ د گەشەبوونێ دا ژ ئەگەرێ وێ چەندێ ئاخفتنکەرێن ڤی زمانی د زێدەبوونێ دانە و رۆژ بۆ رۆژێ پتر گرنگی ژ ئالیێ جھێن پەیوەندیدار ڤە پێ دھێتە دان و کونفرانسێن نێڤدەولەتی ل دۆر زمانی دھێنە ئەنجامدان، سەرەرایی ڤێ چەندێ ژی زمانێ کوردی ئێک ژ زمانێن فەرمی یە ل عیراقێ کو د دستوورێ عیراقێ دا ھاتیە چەسپاندن.
رێوار محەمەد رەشید
