پارتی دیموكراتی كوردستان، بەشداری كۆنفڕانسی پارتی كریستیان دیموكراتی ئەڵمانیا بوون
هەولێر-KDP.info- بە بانگهێشتێكی فەرمیی پارتی كریستیان دیموكراتی ئەڵمانیای فیدراڵ، شاندی پەیوەندییەكانی دەرەوەی پارتی دیموكراتی كوردستان، كە پێكهاتبوو لە هۆشیار سیوەیلی، بەرپرسی مەكتەب و بەرپرسی دێسكی ئەورووپا و بەرپرسی یۆنیتی ئەڵمانیا، لە ڕێگەی ئۆنڵاین لە كوردستانەوە بەشدارییان لە كۆنفڕانسی ٣٤ـەمینی ساڵانەی پارتی كریستیان دیموكراتی ئەڵمانیا (سی.دی.یۆ)ـدا كرد.
بۆ كۆنفڕانسی ٣٤ـەمینی ساڵانەی پارتەكەیان، كە ڕۆژی ٢٢ی ڕێبەندانی ٢٠٢٢ بەڕیوەچوو و بۆ كۆنگرەی ئەمساڵی پارتی (سی.دی.یۆ) بانگهێشتی دەیان میوان و شاندی نیودەوڵەتی و پارتە سیاسییەكانی جیهانی كرابوو، كە پارتی كریستیان دیموكراتی ئەڵمانیا بە چاوی پارتنەر / هاوبەش و دۆستی نزیك لە سیاسەتی دەرەوەی خۆیدا لێیان دەڕوانێ و پەیوەندییەكی بەهیز و پتەویشی لەگەڵیاندا هەیە.
لەسەر ئاستی كوردستان، ئەو پارتە پەیوەندییەكی مێژووییان لەگەڵ پارتی دیموكراتی كوردستاندا هەبووە و لە سەدەی ڕابردوو و تا بە ئەمڕۆ ئەم پەیوەندییانە فراوانتر و گەشەی زیاتریان پێ دراوە.
تاكە پارتی سیاسی لەسەر ئاستی كوردستان، كە (سی.دی.یۆ) خۆی لێی نزیك دەبینێت و بەشداری كۆنفڕانسی ٣٤ـەمینی پارتەكەیان كرابوو، پارتی دیموكراتی كوردستان بوو، كە بەردەوام پارتی (سی.دی.یۆ) شاندی (پ.د.ك)ـی بانگهێشتی كۆنگرە و كۆنفڕانس و چەندین چالاكیی خۆی كردووە لە ڕابردوودا.
پارتی كریستیان دیموكراتی ئەڵمانیای فیدراڵ، لە ڕێگەی ناردنی پەیامی ئەلیكترۆنی و ڕاگۆڕینەوە و ئاراستەكردنی بانگهێشتنامە، خۆشحاڵیی خۆیان بە بەشداری و گرنگیدانی شاندی پارتی دیموكراتی كوردستان لە كۆنگرەی ٣٤ـەمینی پارتەكەیان خستووەتە ڕوو و لە ڕیزبەندی پارتە سیاسییەكانی جیهانی و شاند و میوانانی نێودەوڵەتی وەك پارتنەر / هاوبەشێكی نزیك لە پارتی دیموكراتی كوردستان دەڕوانن.
