غەدر غەدرە

مه‌حفوز مایی

دڤێ دیرووكا درێژ دا، ب دەھان ساڵان گەلێ كورد خەبات كر، خوین دا، ب ھەزارانكەسێن عەزیز و لاوین خوە قوربانی ئازادییا كوردستانێ كرن. ھەتا ئێدی ل باشوورێ كوردستانێ بەرھەمێ وان ھەمی شەھیدان ھاتەدی ئێدی خەلكێ كوردستانێ پاشی وان ھەمی زولم و زۆرداری و وێرانكارییێن كو بسەردا ھات، شیا ئێدی نەفەسەكا ئازادیێ ھەلكێشا.

گەلەك دوژمن و نەحەزان، یێن كو ب شەر و چەك و ترس و كوشتن نەدھێلا كو گەلێ كورد بگەھیتە ئازادیا خوە، ھەر بۆ ڤان مەرەمان ھەمی ئاوایێن دژایەتییێ بكارتینان، بگرە دگەلەك بیاڤاندا كورد بخوەژی، یێن نەفام و نەفسنزم ل دژی خەباتا گەلێ كورد ژ بۆ ئازادیێ بكارتینان.

مە نەڤێت ئەم دڤێ گوتارا بچویك دا ڤەگەرین بۆ وان سەردەمان و وان ھەمی ھەگەر و رەوشێن ھینگێ بینینە زمان و لێكولینان ل سەر بكەین. ئەو ھەمی بوور و سەربوور یێ بسەر خەلكێ مەدا دەرباس بووین، چ تەحل و چ ژی شرین، ئێدی خولكێ مە دڤێت بەرھەمێ ئازادیا خوە دوەلاتێ خوەدا بئازادی بژیت.

ئێدی دڤێت وەلاتێ ھندە سالن خەراب و وێران بووی دڤێت بێتە ئاڤەدانكرن. ھەلبەت ئەركێ ھەری گرنگ و مەزن ژی دكەڤیتە سەر ملێت وان پارتیێن سیاسی كو ب دەھان سالان، ب زەند و خوینا شەھیدان بەرەڤانی ژ ھەبووبا كورد و كوردستانێ كری.

ھەر سەرھەلدانا خەلكێ كوردستانێ و پشتی سندۆقێن ھەلبژارتنێ كەتنە بەر سینگێ خەلكێ كوردستانێ كو نوینەرێن خوە یێن راستەقینە ھەلبژێرن و پەرلەمانێ كوردستانێ ھاتیە دامەزراند و حكومەتەكا كوردی ھاتە دامەزراندن كو ئێدی كورد بخوە حوكمی ل خوە بكەن و دەست ب ئاڤاكرنا وەلاتێ خوە یێ وێرانكری بكەن.

دھەیامێن حكومرانییا كوردان دا، دیسا دوژمن و نەحەزان ب ھەمی پیلانان ھەول ددان كو ئەڤ ئەزمونا ددەستێ كورداندا سەرنەگریت، ب ھەمی ئاوایەكی ھەول دان كو دەستێ خوە بێخنە دناڤ كاروبارێن كوردستانێدا. گەلەك ئاستەنگی و ئالوزی كەتنە بەرسینگێ ھێزێن كوردستانێ و كو ل ڤێرێ نە وەختێ ھندێ یە كو ئەم وان رۆژێت نەخوەش بینین بەرچاڤێت خوە و لسەر بنڤێسین.

یەك ژ دەستكەفتییێن ھەری مەزن كو دئەنجامدانا ئازادبوونا كوردستانێ دا پەیدا بووی، ئازادییا رۆژنامەگەری و ئازادییا تاكەكەسێ كوردستانێ. دنموونەیەكە دیموكراتیدا كو ل ھیچ وەلاتەكێ دەوروبەرێ كوردستانێ نموونا خوە نینە ھاتە فەراھەمكرن. دناڤ ھێزێن سیاسی یێن كوردستان، دناڤ پەرلەمانێ كوردستانێ دا ھێزێن حوكومدار و ھێزێن ۆپۆزسیۆن پەیدا بوون.

مخابن وەك گەلەك تشتێن دی كو ئەم كورد نزانین ب كاربینین ئەو ژبەر كو مە نەبوونە، ئەو ژی بكارانینا پرۆسێسا دەكوراتییێ یە. یا ژمەڤە دەموكراسی ئەوە تۆ بچی بكەیفا خوە بكەڤیا كۆلانا و ھەر كارەكێ خراب تۆ بكەی كەس نەبێژیت وەنە. دامودەزگایێن میری بسۆژە، خراب بكە، پەرلەمانی بەردباران بكە، خەلكی كرێت بكە، جڤینا بدە ھەر كەسەكێ تە دڤێت و ھیچ سەروەری و پیرۆزی ل دەف تە نەبن، ھێرش بكەیە سەر بارەگایێت پارتیێن سیاسی و ھەرچی لێبكەی كەس نەبێژیت وەنەكە.

ھەكە ئەم راستیێێن بوویەرا 17ی شوباتێ لێكدەینەڤە و وەك ھەی و چاوا و بۆچی وەلێھات، دێ بۆ مە دیار بیت كو ھەتا نوكە ژی دەستێ نەھەزان ھەر یێ كارێ خوە دكەت داكو ئەڤ ئاڤەدانكرن و پێشڤەچوونا ل كوردستانێ ھەی و ئەو دەستكەفتی نەمینن. مخابن كو ماكینەیەكا راگەھاندنێ ژی بانزینێ ب ڤی ئاگری دا دكەت و ژ خودێ دڤێت تشتەك، ئالۆزیەك بقەومیت دا ئەو ڤێجا یا نەبووی بێژن و چیرووك و چیڤانووكا پێڤەكەن، چییە؟ ئەڤە راگەھاندنا ئازادە...!

ھەركەس دزانیت كو پارتی دیموكراتی كوردستان مینا مێھڤانەكیە ل باژارێ سلێمانییێ، نە ھێز ھەیە، نە حوكومدارە، نەژی ئیدارەكرنا وی باژێری ددەستێ پارتی دایە. گەلۆ، چما ئەو خوەپیشاندانا موھلەتدایی و جھ و دەم دیاركری ژ رێرەوا خوە دەركەت و ب سەدان خەلك شوونە سەر بارەگایێ لقێ 4 یێ پارتی؟!!

پرێس تیڤی، ئەم ھەمی دزانین كو كەنالەكێ ئیرانییە و ب ئنگلیزی پەخشێ خوە دكەت و پرانیا پەخشێ وی كەنالێ دەنگوباسن. گەلۆ ئەو خێر بوو ھێشتا كەس نەگەھەشتبوو سەر بارەگایێ لوێ 4 دەما پەیامنێرا وی كەنالی ب كامیرەڤە ل بەندا ھاتنا خەلكی بوو، بەری گەھەشتنا ھەر كامیرەك و پەیامنێرەك ژ ھیچ كەنالەكێ دی.

ئەو ھەمی كەنالێن كو خوە بێلایەن دبینن، دڤێ بوویەرێ دا پەردە ژ سەر دێمێ وان رابوو، ئەو ژی ب وی ئاوایێ رامالكرنا خەبەرێن وێ بوویەرێ. تەقە ل بارەگایێ پاری ھاتەكرن، وان بەحس نەكر، ھەر ل بەردەركی سەرا گەلەكا گووت دابچینە سەر بارەگایێ پاری و ھەر وان ئەو ژی بەحس نەكر. ھاتن و دەنگ یێ ھەی كو دا بارەگای سووژن و یێت تێدا ھەمیا سەربرن و دیسا وان ھەر دەنگ نەكر.

گەلەكا فەر بوو كو ئەو وەك دبێژن بێلایەنن، وان ئەو غەدرا ل پارتی ھاتیكرن ل سلێمانیێ بەحسكربا، كو پارتی ل وی باژێری نە مالخوێ یە، بەلكی مێھڤانە و دڤیا وی خەلكی و وان كەنالان ژی بھایێ ھندێ قیمەت دابا وی بارەگای كو یێ حزبەكێ یە ب ھەزاران شەھید بۆ ئازادیا كوردستانێ و بدەستڤەئینانا وێ دیموكراسییێ داین كو ئەو ئەڤرۆ ب ئازادی دەركەڤن سەر جادا و خوەپێشاندنان بكەن..

ھەركەسەكێ ھزرەكێ لێ بكەت دێ زانیت كا چ پیلان ل سەر پارتی ھەیە، ئەو ژی ژبەر كو دوژمنان ژمێژە زانی پارتیا بەرماكا بارزانی و رێبازا وی یە و سەرۆكێ وێ یە كو ژدل بەرەڤانیەكێ ژ گەل و وەلاتێ كوردستانێ بكەن و سەرێ خوە بۆ دوژمنان ناچەمینن.

دڤیا بەری ھەر كەسەكی خەلكێ سلێمانیێ ژی ئەو غەدر قەبیل نەبا كو ل وی باژێری ل پارتی دھێتەكرن، دڤیا ھاتبا زانین كو پارتی ب خەبات و قوربانی و دیرووكا خوە ژ ھندێ مەزنترە كە ھندەك داخدل ب ناڤێ ئازادیێ بارەگایا لێ بسووژن. ھەرچەندە مرۆڤ باوەرناكەت كو خەلكێ سلێمانیێ بخوە پێخوەش بیت كو كارەكێ وەسا ل دژی پارتی بھێتەكرن، كو بەری ژی مە گووت كو تشتەك ل وی باژێری ددەستێ پارتیدا نینە دا خەلك ھندە ژێ تورە ببیت. ھەروەسا مە ھەمیا دیت دەمێ جەنازەیێ بارزانیێ نەمر ھاتیە كوردستانێ، مە دیت كو ئەو پێشوازییا ل باژێرێ سلێمانیێ و ژلایێ خەلكێ وی باژێریڤە لێ ھاتیكرن، ژ ھەمی باژێر و جھێن دی گەلەك مەزنتر و ب جۆشتر بوو. لەوما ئەم دبێژین كو دەستێن نەحەز یێن كو ڤێ راستیێ دبینن، ھەر ئەون چاڤێن وان ب پارتی و دیرووك و سەروەر و خەبات و دەستكەفتیێن پارتی نارابن.

ھەلبەت بەری ھەر كەسەكی پارتی ب وان شەھیدا بریندار و خەمبار بوو، چونكی پارتی یا ھاتی كو بەرەڤانیێ ژوی خەلكی بكەت. لێ مخابن كو ھندەك یێ غەدرێ ل پارتی دكەن و غەدر ھەر غەدرە ھەركەسەك بكەت.