وەزارەتی كشتوكاڵ: دابەشكردنی زەوی كشتوكاڵی دەخرێتە واری جێبەجێكردنەوە
هەولێر-KDP.info- وەزارەتی كشتوكاڵ پڕۆژەی پێدانی زەوی بە دەرچووانی كشتوكاڵ دەخاتە واری جێبەجێكردنەوە و گوتەبێژی وەزارەتەكەش دەڵێ، لیژنەیەك سەرقاڵی ئامادەكاری و دەركردنی رێنماییە.
حوسێن حەمە كەریم، گوتەبێژی وەزارەتی كشتوكاڵ، بە ماڵپەڕی فەرمیی پارتی دیموكراتی كوردستانی راگەیاند: "پڕۆژەی دابەشكردنی زەوی بەسەر دەرچووانی كشتوكاڵدا دەخرێتە واری جێبەجێكردنەوە و لە ئێستادا لیژنەیەكی باڵا لە لایەن وەزارەتی كشتوكاڵەوە پێك ھاتووە بە مەبەستی دانانی ئالیەتی دابەشكردنی زەویی چاندن بەسەر ئەو دەرچووانەدا و دوای دەركردنی رێنمایی و بڵاوكردنەوەی مەرجەكان، دەست بە جێبەجێكردنی پڕۆژەكە دەكرێت".
گوتەبێژی وەزارەتی كشتوكاڵ دەڵێت: "بڕیارەكه ھەموو دەرچووانی زانكۆ و پەیمانگە كشتوكاڵییەكانی ھەرێمی كوردستان دەگرێتەوە و دەرفەتێكە بۆ ئەوەی دەرچووانی بەشی كشتوكاڵ دەست بە كار بكەن و پڕۆژەی تایبەت بە خۆیان ھەبێت لە پسپۆڕیی خۆیاندا".
حوسێن حەمە كەریم روونیشی كردەوە: "بەپێی پلانی وەزارەتی كشتوكاڵ، جگە لە رەخساندنی دەرفەتی كار و پێدانی زەوی بە دەرچووانی كشتوكاڵ، ھاوكات كەرتی كشتوكاڵ بەرەو زانستیبوون دەچێت، چونكە ئەو دەرچووانە بە شێوەی زانستی كار لە پڕۆژەكانیاندا دەكەن".
قائید میرۆ
