هەركی: چوار كەیسی گەندەڵی گەیشتوونەتە په‌رله‌مان
هەولێر-KDP.info- جێگری سەرۆكی لیژنەی دەستپاكی لە پەرلەمانی كوردستان گوتی، چوار كەیسی گەندەڵی گەیشتوونەتە بەردەستی لیژنەی دەستپاكی و دەشڵێ: "لە ئێستادا دەستمان كردووە بە لێكۆڵینەوە و بەدواداچوون لەبارەی ئەو كەیسانە و سەرەتاش لە خاڵە سنوورییەكانەوە دەستمان پێكردووە".
سەعید هەركی، بە ماڵپەڕی فەرمیی پارتی دیموكراتی كوردستانی راگەیاند: " چوار كەیسی گەندەڵی گەیشتوونەتە بەردەستی لیژنەی دەستپاكی، كە یەكێك لەوانە لە خاڵە سنوورییەكانە و ئەوەی دیكەش شاری زەیتوون و یەكێكی دیكەش بەهەدەردانی 20ملیار دینارە لە سلێمانی و ئەوەی تریش پێوەری ئاوە".
هەركی گوتیشی: "دەستمان بە لێكۆڵِینەوە و بەدواداچوون كردووە و سەرەتاش لە خاڵە سنوورییەكانەوە دەستمان پێكردووە، كە تاوەكو ئێستا سەردانی پەروێزخان و باشماخ و حاجی ئۆمەرانمان كردووە و بڕیارە سەردانی ئیبراهیم خەلیلیش بكەین و دواتر دەیكەینە راپۆرتێك و دەیدەینە سەرۆكایەتیی پەرلەمان، بۆ ئەوەی كاری لەسەر بكەین".
ناوبراو باسی لەوەش كرد، یەكێك لە كارەكانی خولی ئەمجارەی پەرلەمان و كابینەی نوێی حكوومەتی هەرێمی كوردستان، رووبەڕووبوونەوەی گەندەڵی دەبێت و چاكسازی ئەنجام دەدرێت.
بڵند ئیبراهیم
