سبەی پێنجشەممە محەمەد حەلبووسی سەردانی ھەولێر ده‌كات
ھەولێر-KDP.info- دوای سەردانی سەرۆككۆماری عێراق بۆ ھەولێر، بڕیارە سبەی سەرۆكی ئەنجوومەنی نوێنەرانی عێراقیش سەردانی ھەولێر بكات و لەگەڵ سەرۆك بارزانی كۆببێتەوە.
د. ڤیان سەبری، سەرۆكی فڕاكسیۆنی پارتی لە ئەنجوومەنی نوێنەرانی عێراق، بۆ ماڵپەڕی فەرمیی پارتی دیموكراتی كوردستان رایگەیاند، رۆژی پێنجشەممە ١٩-٩-٢٠١٩ سەرۆكی ئەنجوومەنی نوێنەرانی عێراق، محەمەد حەلبووسی، سەردانی ھەولێر دەكات و لەگەڵ بەرپرسانی ھەرێمی كوردستان كۆدەبێتەوە.
سەرۆكی فڕاكسیۆنی پارتی لە ئەنجوومەنی نوێنەرانی عێراق راشیگەیاند، بڕیارە لە سەردانەكەیدا بۆ ھەولێر، حەلبووسی لەگەڵ سەرۆك بارزانی و ھەریەك لە سەرۆكی ھەرێمی كوردستان نێچیرڤان بارزانی و سەرۆكی حكوومەتی ھەرێمی كوردستان مەسروور بارزانی كۆببێتەوە.
ناوبراو ئاماژە بەوەش دەكات، سەرۆكی ئەنجوومەنی نوێنەرانی عێراق لە سەردانەكەیدا لەگەڵ بەرێز مسروور بارزانی سەردانی پارێزگای دھۆك دەكەن و بەشداری لە ئاھەنگی زانكۆی ئەمەریكی دەكەن.
رۆژی سێشەممە ١٧-٩-٢٠١٩، بەرھەم ساڵح، سەرۆككۆماری عێراق بە یاوەریی فوئاد حوسێن، وەزیری دارایی عێراق، گەیشتە ھەولێر و لەگەڵ نێچیرڤان بارزانی، سەرۆكی ھەرێمی كوردستان و ئەمڕۆش لەگەڵ سەرۆكوەزیرانی ھەرێمی كوردستان مەسروور بارزانی كۆبووەوە.
ھەڵكەوت محەمەد
