ل دهۆکێ، ئەڤ سالەدا زەلامان زێدەر ژ ژنان سکالایێن توند و تیژیێ تومارکرینە

 

دهۆک-KDP.info- دماوەیێ 16 رۆژادا دێ هەوا  نەهێلانا توند و تیژیێ دژى ژنان ب چەندین چالاکى ئێنە ئەنجامدان، کۆ سکالایێن توند و تیژیێ یێن ل پارێزگەها دهۆکێ هاتینە تومارکرن هەمى جور بخوڤە گرتینە، بەلێ پتریا وان حالەتێن خراب ب کارئینانا ئالاڤێن پەیوەندیکرنێ نە.

پشتى راگەهاندنا هەوا نەهێلانا توند و تیژیێ دژى ژنان لسەر ئاستێ هەرێما کوردستانێ، ئەڤرۆ د رى و رسمەکیدا ب بەرهەڤبوونا پاێزگەرێ دهۆکێ (فەرهاد ئەتروشى) دێ هەوا ناڤبرى ل پارێزگەها دهۆکێ ئێتە راگەهاند، ژبۆ ڤێ ئێکێ موقدمێ ماڤپەروەر ئارام محەمەد، رێڤەبەرێ نەهێلانا توند و تیژیێ دژى ژنان ل دهۆکێ بۆ مالپەرێ فەرمیێ پارتى دیموکراتى کوردستان گۆت:" ژمارا تومارکرنا سکالایێن توند و تیژیى بۆ ئەڤ سالە زێدەتر لێهاتیە ژ سالا بورى، بەلێ رامان ئەو نینە توند و تیژى زێدە بوویە، بەلکو بۆ خەلکێ سڤێل هشیاریا نەهێلانا توند و تیژیێ دروست بوویە کو برێکێن یاسایى مافێن خو بدەستڤە بینن".

رێڤەبەرێ نەهێلانا توند و تیژیێ دژى ژنان ل دهۆکێ خویاکر:" دێ بوو ماوەیێ 16 رۆژا ئەڤ هەوە بەردەوام بیت و چەندین چالاکى دێ ئێنە ئەنجامدان، بەلێ رامان ئەو نینە بەس دڤان رۆژاندا چالاکیێن نەهێلانا توند و تیژیێ دئێتە پرێڤەبرن بەلکو ماوەیێ سالێ هەموویى بەرهنگاربوونا توند و تێژیێ دئێتە بەحسکرن و کێمکرن".

ئارام محەمەد خویاکر:" توند و تیژیا خیزانى پتر لێهاتیە و دئەڤ سالەدا زەلامان پتر سەرەدانا رێڤەبەریا نەهێلانا توند و تیژیێ کریە و سکالا تومارکرینە".

دهەمان دەمدا ل قەزا ئاکرێ ژى توند و تیژى د زێدەبوونێ دایە، ژبۆ ڤێ مەرەمێ موقەدمێ ماڤپەروەر محەمەد ئەمین عەلى، بەرپرسێ نڤیسینگەها نەهێلانا توند و تیژیێ دژى ژنان ل قەزا ئاکرێ بۆ مالپەرێ فەرمیێ پارتى دیموکراتى کوردستان گۆت:" سکالایێن توند و تیژیێ یێن هاتینە تومارکرن هەمى جور بخوڤە گرتینە، بەلێ پتریا وان حالەتێن خراب ب کارئینانا ئالاڤێن پەیوەندیکرنێ نە، کۆ گەفکرن برێکا تورێن جڤاکى دا بەرەڤ زێدەبوونێ یە، ژبەر ڤێ ئێکێ گرنگە گەنج لسەر هوشیاریا ب کارئینانا ئەنترنتێ و ب تایبەت تورێن جڤاکى بهێتە پەروەردەکرن داکو ئەڤ حالەت بەرەڤ کێمیێ بچن".

رێڤەبەریا گشتى یا توند و تیژیێ دژى ژنان ل هەرێما کوردستانێ ئامارا 9 هەیڤێن سالا 2018ێ دیارکر بوون، کۆ د 9 هەیڤاندا 54 ژنان خۆ کوشتیە، 37 ژن هاتینە کوشتن، 87 ژنان دەستدرێژیا سکسى لسەر هاتیە کرن و 90 ژنان خو سوتى یە، کۆ ب شێوەکێ گشتى د 9 هەیڤێن ئەڤ سالەدا 7 هزار 192 سکالا ژلایێ ژنان ڤە دژى توند و تیژیا لوان دئێتەکرن هاتینە تومار کرینە.

هەلز عەلى سەلیم