نیوەی كارگە لەكارکەوتووەكانی كوردستان دەستیان بە كار كردووەتەوە

 

هەولێر-KDP.info- بەرپرسێكی حكوومەتی ھەرێمی كوردستان، گەشبینە بەوەی گەشەی ئابووریی ھەرێم گەیشتووەتە ئاستێك ئەو كارگانەی لە چەند ساڵی ڕابردوودا بە ھۆی قەیرانی داراییەوە كارەکانیان ڕاگرتبوو، دەستیان بە كار كردووەتەوە و دەشڵێ، ژمارەیەك كۆمپانیای بیانی بۆ كاركردن لە كەرتی پیشەسازیدا ھاتوونەتە كوردستان.

 

قەیرانی دارایی و شەڕی سێ ساڵەی بەرەنگاربوونەوەی داعش، كاریگەریی زۆری كردبووە سەر كەرتی پیشەسازی و زۆرێك لە كارگەكان بە ھۆی بێكارییەوە كارەكانیان ڕاگرتبوو، ئاراس ڕەئووف، بەڕێوەبەری گشتیی پیشەسازیی حكوومەتی ھەرێمی كوردستان، ئاماژەی بۆ ئەوە كرد: "بە ھۆی قەیرانی دارایی و شەڕی داعشەوە، ٥٠%ی كارگەكانی ھەرێمی كوردستان لەكار كەوتبوون، بەڵام ڕەوشی ئابووریی ھەرێمی كوردستان بەرەو گەشەكردن دەچێت و كارگە لەكارخراوەكان ھێدی ھێدی وا دەست بە كارەكانیان دەكەنەوە و ھەنگاوی باش نراوە لەبارەی بەكارخستنی كارگەكانی ھەرێمی كوردستانەوە".

 

بەڕێوەبەری گشتیی پیشەسازی، بۆ ماڵپەڕی فەرمیی پارتی دیموكراتی كوردستان گوتی: "ئەگەر پێشتر نیوەی كارگەكان لە كار وەستابووبن، ئەوە ڕێژەكە زۆر كەم بووەتەوە و دەتوانم بڵێم نیوەی زیاتری كارگە لەكارخراوەكان كەوتوونەتە كاركردن و ھەنگاو بەرەو ئەوە دەنێن ئەو كارگانەی ماویشن دووبارە دەست بە كار بكەنەوە، چونكە ڕەوش لەبارە بۆ بازرگانی و كاركردن لە ھەرێمی كوردستاندا".

 

لەبارەی ھاتنی وەبەرھێنەری بیانی و گەشەپێدانی كەرتی پیشەسازییەوە، ڕەئووف ڕوونی كردەوە: "ئێمە لە ھەوڵداین ئاسانكاریی زیاتر بۆ كەرتی تایبەت بكەین، ئەمساڵ ژمارەیەك وەبەرھێنەری بیانی ھاتوونەتە كوردستان و لقی كۆمپانیا و بریكاریان لە ھەرێمی كوردستاندا كردووەتەوە، ئەمەیش جێگەی دڵخۆشییە لە بەرەوپێشبردنی كەرتی پیشەسازیدا بازرگان و وەبەرھێنەری بیانییش بەشدار بن".

 

قائید میرۆ