ئه‌ڵمانیا له هاوكاریكردنی پێشمه‌رگه به‌رده‌وام ده‌بێ
هه‌ولێر-KDP.info- له‌دیداریدا له‌گه‌ڵ سه‌رۆكوه‌زیرانی كوردستان، وه‌زیری ده‌ره‌وه‌ی ئه‌ڵمانیا دڵخۆشیی خۆی بە سەردانی هەرێمی كوردستان و ڕزگاركردنی شەنگال لەلایەن هێزی پێشمەرگەی كوردستانەوە دەربڕی و پشتگیریی خۆی و خەڵك و حكوومەتی ئەڵمانیای بۆ خەڵك و حكوومەتی هەرێمی كوردستان و پێشمەرگە پیشان دا و بەردەوامی هاوكارییە سەربازییەكانی وڵاتەكەی بۆ پێشمەرگە دووپات كردەوە
نیوەڕۆی ئەمڕۆ 2015/12/8 (نێچیرڤان بارزانی) سەرۆكوەزیرانی هەرێمی كوردستان، پێشوزای لە (فرانك ڤاڵتەر شتاینمایەر) وەزیری دەرەوەی ئەڵمانیا و شاندێكی دیپلۆماسیی یاوەری كرد.
لە دیدارێكدا كە قوباد تاڵەبانی جێگری سەرۆكوەزیران و ژمارەیەك وەزیر و كاربەدەستانی حكوومەتی هەرێمی كوردستان ئامادەیبوون، شتاینمایەر دڵخۆشیی خۆی بە سەردانی هەرێمی كوردستان و ڕزگاركردنی شەنگال لەلایەن هێزی پێشمەرگەی كوردستانەوە دەربڕی و پشتگیریی خۆی و خەڵك و حكوومەتی ئەڵمانیای بۆ خەڵك و حكوومەتی هەرێمی كوردستان و پێشمەرگە پیشان دا و بەردەوامی هاوكارییە سەربازییەكانی وڵاتەكەی بۆ پێشمەرگە دووپات كردەوە.
هەروەها باسی لە قەیرانی ئابووری و هاتنی ژمارەیەكی زۆری ئاوارە و پەنابەرانی دەستی تیرۆر بۆ هەرێمی كوردستان كرد و ئاماژەی بەوە دا كە وڵاتەكەی هەوڵ دەدات كۆمەڵگەی نێودەوڵەتی لە سوككردنی ئەو بارگرانییە، هاوكاریی هەرێمی كوردستان بكات. سەبارەت بە پەیوەندییەكانی نێوان هەولێر و بەغدا و كێشە ناوخۆییەكانی هەرێمی كوردستانیش، پشتگیریی خۆی و وڵاتەكەی بۆ چارەكردنی سەرجەم كێشەكان بە ڕێگەی گفتوگۆ و دیالۆگ پیشان دا.
لای خۆیەوە سەرۆكوەزیرانی هەرێمی كوردستان سوپاسی ئەو سەردانەی كرد و هاوكارییە سەربازی و مرۆییەكانی ئەڵمانیای بۆ هێزی پێشمەرگە و ئاوارە و پەنابەران لە هەرێمی كوردستان بەرز نرخاند و هیوای خواست هاوكارییە سەربازییەكان بۆ پێشمەرگە بەپێی قۆناغی ئێستای شەڕی دژی تیرۆرستانی داعش بێت چونكە دوای ئازادكردنی شەنگال، شێوازی شەڕ گۆڕانی بەسەردا هاتووە. بە پێویستیشی زانی هاوپەیمانی نێودەوڵەتی و تەنانەت وڵاتانی دەرەوەی هاوپەیمانییەكەش زیاتر هاوكاری و هەمانگیی یەكتری بكەن بۆئەوەی بتوانرێت مەترسی تیرۆر بە یەكجاری بنبڕ بكرێت و ئاسایش و ئارامی بۆ ناوچەكە بگەڕێتەوە.
هەروەها ئاماژەیشی دا كە هەرێمی كوردستان پێویستی بە هاوكاریی مرۆیی زیاتر هەیە بە تایبەت كە ژمارەی ئاوارە و پەنابەران ڕۆژ بە ڕۆژ لە زیادبووندایە و پێشبینیش دەكرێت دوای دەستپێكردنی ئۆپەراسیۆنی ڕزگاركردنی مووسڵ، ژمارەیان زیاتر ببێت لە كاتێكدا هەرێم بە قەیرانێكی قورسی دارایی و ئابووریدا تێپەڕ دەبێت كە ئەمە بارگرانییەكی یەكجار زۆر دەبێت بۆ سەر هەرێمی كوردستان.
دەربارەی چارەكردنی گرفتەكانی نێوان هەولێر و بەغدا، نێچیرڤان بارزانی رایشگه‌یاند كە پێویستە هەموو كێشەكان بە ڕێگەی دیالۆگ و گفتوگۆ چارە بكرێن. سەبارەت بە ڕەوشی ناوخۆی هەرێمی كوردستانیش ئاشكرایكرد كە دیالۆگی جددی لە نێوان لایەنە سیاسییەكانی هەرێمی كوردستاندا هەیە بە مەبەستی چارەسەر كردنی ئەو كێشە سیاسیانەی بەم دواییانە سەریان هەڵداوە.
تاوتوێ كردنی بارودۆخی ناوخۆی عێراق و ناوچەكە و پوەندییەكانی نێوان هەولێر و بەغدا لەلایەك و هەرێمی كوردستان و وڵاتانی دەوروبەر لە لایەكی دیكە، لایەنێكی دیكەی دیدارەكە بوو.
