"هێنانی حەشدی شەعبی نە بە ڕەزامەندی سەرۆك بارزانی بووە و نە كەسیش داوای لێ كردووە ڕەزامەندی پیشان بدات"

هه‌ولێر-KDP.info-  گوته‌بێژی فه‌رمیی سه‌رۆكایه‌تی هه‌رێمی كوردستان رایده‌گه‌یه‌نێت كه‌ هێنانی حەشدی شەعبی بۆ نێو خاكی كوردستان نە بە ڕەزامەندی  سەرۆك بارزانی بووە و نە كەسیش داوای لێ كردووە ڕەزامەندی پێشان بدات.

ده‌قی روونكردنه‌وه‌ی گوته‌بێژی فه‌رمیی سه‌رۆكایه‌تی هه‌رێمی كوردستان:

لە كۆڕێكی لێپرسراوی دەستەی كارگێڕیی مەكتەبی سیاسیی یەكێتی نیشتیمانی كوردستان لە زانكۆی سلێمانی لەبارەی هاتنی حەشدی شەعبی هەندێ قسە كراوە و ناوی بەڕێز سەرۆكی هەرێمی كوردستان هاتووە و لە میدیاكانیش خوێندنەوەی جۆراوجۆر بۆ ئەم بابەتە كراوە.
لێرەدا بە گشت لایەكی ڕادەگەیێنین كە سەبارەت بە بابەتی حەشدی شەعبی هەڵوێستی بەڕێز سەرۆكی هەرێمی كوردستان لە ئێستا و لە پێشوودا زۆر ڕوون و ئاشكرا بووە كە هەرێمی كوردستان لە تێكشكاندن و لەناوبردنی تیرۆریستاندا ناكۆكی لەگەڵ حەشدی شەعبیدا نییە و هەر كات بۆ شەڕكردن لەگەڵ داعش پێویست بێت هێزی پێشمەرگە و حەشد یارمەتیی یەكتر بدەن. بەڵام ئەوە بەو مانایە نییە حەشدی شەعبی بێت دوزخورماتو داگیر بكات كە خاكی كوردستانە و پێشمەرگە دەیپارێزێت.

جەنابی (سەرۆك بارزانی) جەخت لەوە دەكاتەوە كە خاكی كوردستان جێگەی حەشدی شەعبی نییە و كوردستان پێشمەرگە و هێزی ئاساییشی خۆی هەیە و پێویست بە هیچ هێزێكی تر ناكات. هێنانی حەشدی شەعبی بۆ نێو خاكی كوردستان نە بە ڕەزامەندی  (سەرۆك بارزانی) بووە و نە كەسیش داوای لێ كردووە ڕەزامەندی پێشان بدات بۆ هاتنی حەشدی شەعبی.

گوتەبێژی فەرمیی سەرۆكایەتیی هەرێمی كوردستان.
18ـی 11ـی 2015