کرواتیا: هاوکاریکردنی هەرێمی کوردستان هاوکاریکردنی هەموو جیهانە
کرواتیا -KDP.info- لە زاگریبی پایتەختی کرواتیا وەزیری دەرەوەی ئەو وڵاتە پێشوازیکرد لە (فەلاح مستەفا)، بەرپرسی پەیوەندییەکانی دەرەوەی حکوومەتی هەرێمی کوردستان.
(ڤێزنا پوسیچ)، جیگرى یەکەمى سەرۆکوەزیران و وەزیرى دەرەوەی ئەو وڵاتە رایگەیاند: "سوپاسی حکوومەتى هەرێمى کوردستان دەکەین بۆپێشوازیکردن لەو ژمارە زۆرەى ئاوارە و پەنابەران". هاوکات پشتگیرى کرواتیاى دووپات کردەوە لە رووى هاوکارى مرۆیى بۆ هەرێمى کوردستان.
(ڤێزنا پوسیچ) گوتی: " بەردەوام دەبین لەسەر هاوکارى سەربازى هێزەکانى پێشمەرگە، ئەمەش تەنیا هاوکارى کردنى هەرێمى کوردستان نییە، بەڵکه هاوکارى هەموو جیهانە، لەبەرئەوەى پێشمەرگە بەنوێنەرایەتى جیهان شەڕ دەکات".
(فەلاح مستەفا)، بەرپرسی پەیوەندییەکانی دەرەوەی حکوومەتی هەرێمی کوردستان، بەناوى حکوومەت و گەلى کوردستان سوپاسى حکوومەتى کرواتیاى کرد بۆ پشتگیرى لە هێزەکانى پێشمەرگە و هاوکارى مرۆیى بۆ ئاوارە و پەنابەران.
هاوکات ئامانجى سەردانەکەى خستەڕوو کە بۆ زیاتر بەرەوپێش بردنى پەیوەندییەکانی نێوان هەرێمى کوردستان و کرواتیایە لە بوارەکانى سیاسى، ئابورى، پەروەردە و کولتورى. هەروەها داواى هاوکارى کرد بۆ چارەسەرى بریندارانى هێزەکانى پێشمەرگە و ئەو کەسانەى لەدەست داعش رزگاریان بووە و پێویستیان بە چارەسەرى دەروونى هەیە.
هەردوولا هاوڕابوون لەسەر کارکردن بەیەکەوە بۆ ئامادەکارى بۆ واژۆکردنى یاداشتنامەیەکى ڵێک تێگەیشتن لە نێوان هەردوولا کە نەخشە رێگایەک دەبێت بۆ پتەوکردنى بوارەکانى هاوکارى و هەماهەنگى نێوان کرواتیا و هەرێمى کوردستان.
هەروەها هاوڕابوون لەسەر ئەنجامدانى کۆڕبەندى ئابورى و بازرگانى بۆ زیاتر لەیەکتر نزیک کردنەوەى کۆمپانیاکان و پەرەپێدانى پەیوەندیە ئابوورى و بازرگانیەکان.
