ئەمەریکا پاڵپشتی بۆ حکوومەتی هەرێم دووپات کردەوە
هەولێر-KDP.info-باڵیۆزی عێراق لەمیانی سەردانی بۆ لای سەرۆکوەزیرانی کوردستان پشتگیری و پاڵپشتی حکوومەتی ئەمەریکای بۆ حکوومەتی هەرێم دووپات کردەوە و رایگەیاند کە، كە لە هاوكارییەكانیان بۆ هەرێمی كوردستان لە هەموو بوارەكاندا بەردەوام دەبن بە تایبەتی لە بواری سەربازی و مەشق و ڕاهێنان بە هێزی پێشمەرگە..لای خۆیشیەوە سەرۆکوەزیرانی کوردستان، هاوكارییەكانی ئەمەریكای بۆ هەرێمی كوردستان بەرز نرخاند.
پاشنیوەڕۆی ئەمڕۆ سێشەممە 24/6/2015 (نێچیرڤان بارزانی) سەرۆكوەزیرانی هەرێمی كوردستان پێشوازی لە (ستیوارت جۆنز) باڵیۆزی ویلایەتە یەكگرتووەكانی ئەمەریكا لە عێرا ق و شاندێكی دیبلۆماسی و سەربازیی یاوەری كرد.
لە دیدارێكدا باڵیۆزی ئەمەریكا پاڵپشتیی خۆی و حكوومەتی ئەمەریكای بۆ حكوومەتی هەرێمی كوردستان و پێشمەرگە لە شەڕی دژی تیرۆرستانی داعش دەربڕی و دووپاتی كردەوە كە لە هاوكارییەكانیان بۆ هەرێمی كوردستان لە هەموو بوارەكاندا بەردەوام دەبن بە تایبەتی لە بواری سەربازی و مەشق و ڕاهێنان بە هێزی پێشمەرگە. هەروەها باسی لە بارودۆخی ناوچەكە بە گشتی و بە تایبەتی ڕووبەڕووبوونەوەی تیرۆرستانی داعش لەو ناوچانەی كە كۆنترۆڵی كردوون، كرد.
لە بەشێكی دیكەی دیدارەكەدا باس لە كێشە و گرفتەكانی نێوان هەولێر و بەغدا كرا و لەو بارەیەوە باڵیۆزی ئەمەریكا دەستخۆشی لە حكوومەتی هەرێمی كوردستان كرد كە توانیویەتی ئەو ئەركەی لەسەر شانیەتی جێبەجێی بكات و جەختی لەوەش كردەوە كە پێویستە بەغدا پابەندی جێبەجێكردنی ئەو ئەركانە بێت كە لەسەر شانییەتی و شایستە داراییەكانی هەرێمی كوردستان بە تەواوەتی بنێرێت چونكە بارێكی قورس كەوتۆتە سەر شانی حكوومەتی هەرێمی كوردستان، پشتگیریی خۆیشی بۆ چارەسەركردنی كێشەكان لە ڕێگەی دیالۆگ و گفتوگۆ دەربڕی.
لای خۆیەوە سەرۆكوەزیرانی هەرێمی كوردستان سوپاسی ئەو سەردانەی باڵیۆزی ئەمەریكای لە عێراق كرد و پاڵپشتی و هاوكارییەكانی حكوومەت و خەڵكی ئەمەریكای لە كاتی تەنگانەدا بۆ خەڵك و حكوومەت و پێشمەرگەی كوردستان بەرز نرخاند و هەروەها پوختەیەكیشی لەبارەی بارودۆخی ناوچەكە و شەڕی دژی تیرۆر و سەركەوتنەكانی پێشمەرگەوە پێشكەش كرد.
دەربارەی پەیوەندییەكانی نێوان هەولێر و بەغدا و كێشەكانی نێوان هەردوولا، ئاماژەیشی دا كە هەرێمی كوردستان لایەنگریی ئەوە دەكات كێشەكانی لەگەڵ بەغدا بە گفتوگۆ چارە بكات، بەڵام لە هەمان كاتدا گەر بەغدا پابەند نەبێت حكوومەتی هەرێم هەموو ڕێگایەك دەگرێتە بەر بۆئەوەی پێداویستییەكانی هاوڵاتیانی هەرێمی كوردستان دابین بكات بە تایبەتی چارەكردنی كێشەی مووچە و دابینكردنی پێداویستییەكانی پێشمەرگە.
