لە دەڤەری سۆران 6359 كەمئەندام مووچە وەردەگرن

سۆران-KDP.info-بەڕێوەبەری چاودێری و گەشەپێدانی كۆمەڵایەتی سۆران دەڵێ: لە دەڤەری سۆران 6359 كەمئەندام و  3600 كەس لە تۆڕی چاودێری خێزان سوودمەندن، مانگانەیش ئەو رێژەیە گۆڕانكاریان بەسەردا دێت؛ رۆژی یەك شەممەیش مووچەی 2 مانگ دابەش دەكرێت.
(توران خدر) بەڕێوەبەری چاودێری و گەشەپێدانی كۆمەڵایەتی سۆران بە ماڵپەڕی فەرمی پارتیی دیموكراتی كوردستان رایگەیاند، هەرچەندە بڕیاربوو رۆژی چوار شەممە مووچەی هەردوو مانگی 3 و 4ـی كەمئەندامان و تۆڕی چاودێری كۆمەڵایەتی دابەش بكرێت كە 300 هەزار دینارە، بەڵام بەهۆی دروستبوونی كێشەیەك لە لیستی ناوەكان وادەکە دواخرا بۆیە كەمئەندامان و ئەوانەی لە تۆڕی چاودێریی كۆمەڵایەتی ناویان تۆمار كراوە، دڵنیایان دەكەینەوە رۆژی یەك شەممە لە بانكەكانی سنووری خۆیان مووچەی دوو مانگ وەردەگرن، كە بۆ هەر مانگێك 150 هەزار دینارە.
بەڕێوەبەری چاودێری و گەشەپێدانی كۆمەڵایەتی سۆران، گوتیشی، لە دەڤەری سۆران، مێرگەسۆر، چۆمان و ڕواندز 6359 كەمئەندام هەن، كەمئەندامەكانیش جۆراوجۆرن،  لەگەڵ 3600 كەس كە لە تۆڕی چاودێری خێزان سوودمەندن؛ مانگانەیش گۆڕانكاری بەسەر ژمارەكان دێت، بە هۆی هاتنی ڕێنمای نوێ لە وەزارەتەوە.

ڕابین شێروانی