نێچیرڤان بارزانی سوپاسی هاوكارییەكانی ئێران دەكات
هەولێر-KDP.info-سەرۆکوەزیرانی کوردستان لەپێشوازی جێگری وەزیری دەرەوەی کۆماری ئیسلامی ئێران، سوپاسی كۆماری ئیسلامیی ئێرانی كرد كە هەر لە سەرتاوە هاوكاریی هەرێمی كوردستانی كردووە، هەروەك چۆن لە پێش و پاش ڕاپەڕینی بەهاری ساڵی 1991ی گەلی كوردستانیش هاوكاریی پەنابەران و خەڵكی هەرێمی كوردستانی كردووە.
نیوەڕۆی ئەمڕۆ یەكشەممە 14/6/2015 (نێچیرڤان بارزانی) سەرۆكوەزیرانی هەرێمی كوردستان، پێشوازی لە (حەسەن قەشقایی) جێگری وەزیری دەرەوەی كۆماری ئیسلامیی ئێران بۆ كاروباری كونسڵگەری و پەرلەمان و شاندێكی یاوەری كرد.
لە دیدارێكدا جێگری وەزیری دەرەوەی کۆماری ئیسلامی ئێران، سڵاو و ڕێزی بەرپرسانی باڵای كۆماری ئیسلامیی ئێرانی بە سەرۆكوەزیرانی هەرێمی كوردستان گەیاند و سەرسامیی خۆی بۆ پێشكەوتنەكانی هەرێمی كوردستان نیشان دا و سوپاسی پێشوازی و میوانداریی گەرمی هەرێمی كوردستانی لە خۆی و شاندی یاوەری كرد، هەروەها كونسوڵی نوێی وڵاتەكەی لە سلێمانی بە سەرۆكوەزیران ناساند. جەختی لەوەش كردەوە كە وڵاتەكەی زۆر نیگەرانی ئاسایشی عێراق و هەرێمی كوردستانە و ڕووبەڕووبوونەوەی تیرۆرستانی داعشی بە ئەركێكی هاوبەشی هەمووان لە قەڵەم دا و لەمبارەیەوە بەردەوامیی هاوكارییەكانی تارانی بۆ بەغدا و هەولێر دووپات كردەوە.
لای خۆیەوە (نێچیرڤان بارزانی) سەرۆكوەزیرانی هەرێمی كوردستان وێڕای پیرۆزباییكردن لە (قەشقایی) كە ماوەیەكی كەمە وەك جێگری وەزیری دەرەوەی كۆماری ئیسلامیی ئێران بۆ كاروباری كونسولگەری و پەرلەمان دەستبەكار بووە، هەروەها پیرۆزبایی لە كونسوڵی گشتیی نوێی كۆماری ئیسلامیی ئێران لە پارێزگای سلێمانیش كرد. هەروەها تیشكی خستە سەر ڕۆڵی پێشمەرگە لە شكاندنی تیرۆرستانی داعش و سوپاسی كۆماری ئیسلامیی ئێرانی كرد كە هەر لە سەرتاوە هاوكاریی هەرێمی كوردستانی كردووە، هەروەك چۆن لە پێش و پاش ڕاپەڕینی بەهاری ساڵی 1991ی گەلی كوردستانیش هاوكاریی پەنابەران و خەڵكی هەرێمی كوردستانی كردووە. هەروەك هەڕەشەی داعشی بۆ سەر هەرێمی كوردستان و ئاسایشی ئێران بە مەترسییەكی ڕاستەقینە لە قەڵەم دا.
سەرۆكوەزیرانی هەرێمی كوردستان لە بەشێكی دیكەی قسەكانیدا هیوای خواست كە دوایین ڕێككەوتنی نێوان ئێران و وڵاتانی ڕۆژئاوا لەسەر پرۆگرامی ئەتۆمیی ئێران بە سەركەوتوویی بەڕێوە بچێت و لە بەرژەوەندیی كۆماری ئیسلامیی و ناوچەكە و هەموو لایەنەكاندا بێت.
هەر لە دیدارەكەدا كێشەكانی نێوان هەولێر و بەغدا، پەیوەندییەكانی نێوان هەرێمی كوردستان و كۆماری ئیسلامیی ئێران و چۆنییەتیی برەودانی زیاتر بە پەیوەندییەكانی لە هەموو بوارەكاندا بە تایبەتی لەو بوارانەدا كە بۆ هەردوولا گرنگن، تاوتوێ كرا.
