نێچیرڤان بارزانی و محەمەدی حاجی مەحموود جەختیان لە گرینگیی یەکڕیزی و تەبایی لایەنە سیاسییەکان کردەوە
سلێمانی-KDP.info- سەرۆکوەزیرانی کوردستان (نێچیرڤان بارزانی) سەردانی (محەمەدی حاجی مەحموود)ـی کرد و لە دیدارێکدا جەخت لە داكۆكی لەسەر گرنگیی یەكڕێزی و تەبایی نێوان لایەنە سیاسییەكانی هەرێمی كوردستان بە تایبەتی لە بارودۆخی ئەمڕۆدا كرایەوە.
پێشنیوەڕی ئەمڕۆ 8/6/2015 (نێچیرڤان بارزانی) سەرۆكوەزیرانی هەرێمی كوردستان سەردانی (محەمەدی حاجی مەحموود) سكرتێری حزبی سۆسیالست دیموكراتی كوردستانی لە شوێنی مانەوەی لە گوندی گوڵەخانە لە ناوچەی شارەزوور كرد.
لە دیدارێكدا دوایین پێشهاتەكانی ناوچەكە و شەڕی دژی تیرۆر و كێشەكانی نێوان هەولێر و بەغدا و بە تایبەتیش پرسی نەوت و پابەند نەبوونی حكوومەتی عێراقی فیدڕاڵ بە جێبەجێكردنی دوایین ڕێككەوتنی نێوان هەولێر و بەغدا و یاسای بودجەی عێراقی فیدراڵی ساڵی 2015 و هەروەها پرۆسەی سیاسی لە ناوخۆی كوردستان و تەواوی عێراق، تاوتوێ كران.
هەروەها داكۆكی لەسەر گرنگیی یەكڕێزی و تەبایی نێوان لایەنە سیاسییەكانی هەرێمی كوردستان بە تایبەتی لە بارودۆخی ئەمڕۆدا كرایەوە و هاوهەڵوێستی و یەكڕێزی خەڵك و لایەنە سیاسییەكانی كوردستان بەرامبەر تەحدیاتی ئێستا چ لە شەڕی دژی تیرۆر چ لەو قەیرانە داراییەی كە لە ئەنجامی بڕینی بودجەی هەرێمی كوردستان و پابەند نەبوون بە یاسای بوجەی عێراقی فیدراڵەوە ڕووبەڕووی هەرێمی كوردستان دەبنەوە، دووپات كرایەوە.
هەر لە دیدارەكەدا ئەنجامی دوایین هەڵبژاردنەكانی توركیا هەڵسەنگێنرا و هەردوولا هیوایان خواست كە ئەنجامی هەڵبژاردنەكان لە خزمەتی تەواوی توركیادا بێت و هاندەرێك بێت بۆ چارەكردنی پرسی كورد لەو وڵاتە.
دوای دیدارەكەش لە وەڵامی پرسیاری ڕۆژنامەواناندا، سەرۆكوەزیرانی هەرێمی كوردستان دووپاتی كردەوە كە حكوومەتی هەرێمی كوردستان خوازیارە كێشەكانی لەگەڵ بەغدا چارەبكات، بەڵام ئەگەر بەغدا پابەند نەبوو، هەرێمی كوردستان بیر لە ڕێگا چارەی دیكە دەكاتەوە. هەروەها دووبارە هیوای خواست كە ئەنجامی هەڵبژاردنەكانی توركیا ببێتە هاندەرێك بۆ چارەكردنی پرسی كورد لەو وڵاتە.
