سەرۆک بارزانی ته‌قینه‌وه‌كه‌ی ئامه‌دی سه‌ركۆنه كرد
هەولێر-KDP.info- وێڕای سەرکۆنەکردنی تەقینەوەکەی ئامەد، گوتەبێژی فەرمیی سەرۆکایەتیی هەرێمی کوردستان رایدەگەیەنێت کە، سەرۆكی هەرێمی كوردستان ئیدانەی ئەو تەقینەوانە دەكات و ئومێدی ئەوە دەخوازێ هەڵبژاردنەكانی توركیا لە بەرژەوەندیی گەلانی توركیا بە ئەنجام بگات.
دەقی راگەیاندراوەکە:
بەداخەوە ڕۆژی هەینی 5ـی 6ـی 2015 لە گردبوونەوەیەكی جەماوەریی بۆ بانگەشەی هەڵبژاردن لە شاری ئامەد دوو تەقینەوە ڕووی دا و بووە هۆی برینداربوونی ژمارەیەك هاووڵاتی و دروستبوونی نیگەرانی و دڵەڕاوكێی هاووڵاتیان. بەڕێز سەرۆكی هەرێمی كوردستان ئیدانەی ئەو تەقینەوانە دەكات و ئومێدی ئەوە دەخوازێ هەڵبژاردنەكانی توركیا لە بەرژەوەندیی گەلانی توركیا بە ئەنجام بگات. هەروەها بەڕێزیان هیواخوازە هەڵبژاردنەكان لە هێمنی و ئارامی و لە كەشێكی دیموكراسیانە بەڕێوە بچێت و دواجار خزمەتی پێشڤەچوونی پڕۆسەی ئاشتی لە توركیا و سەقامگیری بكات.
د. ئومێد سەباح
گوتەبێژی فەرمیی سەرۆكایەتیی هەرێمی كوردستان
6ـی 6ـی 2015
