نێچیرڤان بارزانی ڕۆڵی دامودەزگاكانی حكوومەت لە دهۆك بەرز دەنرخێنێت
دهۆک-KDP.info-سەرۆکوەزیرانی کوردستان (نێچیرڤان بارزانی) سوپاس و پێزانینی خۆی و حكوومەتی هەرێمی كوردستانی بۆ ئەو كار و خزمەتگوزارییانە دووپات كردەوە كە دامودەزگا حكوومییەكانی پارێزگای دهۆك پێشكەش بە ئاوارە و پەنابەرانی كردووە.
لە بەردەوامی سەردانەكەیدا بۆ پارێزگای دهۆك، نیوەڕۆی ئەمڕۆ پێنجشەممە 4/6/2015 بەڕێز نێچیرڤان بارزانی سەرۆك وەزیرانی هەرێمی كوردستان لەگەڵ پارێزگار و بەڕێوەبەران و بەرپرسانی یەكە ئیدارییەكان و دامودەزگا حكوومییەكانی سنووری پارێزگای دهۆك كۆبووەوە.
لە كۆبوونەوەكەدا ئامادەبووان باسیان لە كێشە و گرفتەكانی دامودەزگا خزمەتگوزارییەكانی سنووری پارێزگاكەیان كرد و پێداویستییەكانی ئەو سنوورەیان لە هەموو كەرتە خزمەتگوزارییەكانی وەك ئاو، كارەبا، تەندروستی، پەروەردە، شارەوانییەكان، خۆراك و خواردەمەنی، ئاساییش و هێزەكانی ناوخۆ، ڕێگەوبان و تەواوی كەرتەكان خستە ڕوو.
هەروەها تیشكیان خستە سەر ئەو بارقورسییەی كە لەسەر دامودەزگا كارگێڕی و خزمەتگوزارییەكانی پارێزگای دهۆك لە ئەنجامی شەڕی دژی تیرۆر و هاتنی ئەو ژمارە زۆرەی ئاوارە و پەنابەران، دروست بووە.
لە لای خۆیەوە (نێچیرڤان بارزانی) سەرۆكوەزیرانی هەرێمی كوردستان سوپاس و پێزانینی خۆی و حكوومەتی هەرێمی كوردستانی بۆ ئەو كار و خزمەتگوزارییانە دووپات كردەوە كە دامودەزگا حكوومییەكانی پارێزگای دهۆك پێشكەش بە ئاوارە و پەنابەرانی كردووە و جەختی لەوە كردەوە كە حكوومەتی هەرێمی كوردستان هەموو هەوڵێك دەدات پێداویستییەكانی لایەنە پەیوەندارەكانی سنووری پارێزگاكە دابین بكات بۆ ئەوەی بتوانن خزمەتگوزاریی پێویست پێشكەش بە هاوڵاتیان و ئاوارە و پەنابەران بكەن و دام و دەزگاكانی حكوومەت وەك پێویست كار و ئەركەكانی خۆیان جێبەجێ بكەن.
