پەكەكە سووكاتیێ ب پیرۆزێن ئێزدییان دكەت
شنگال-KDP.info- ژێدەرێن ئاگەهدار راگەهاندن، كو پارتا كەرێكارێن كوردستانێ په‌كه‌كە رابوینا ب دروستكرنا دوو قوبان ل نیزیكی مەزارێ شێبل قاسم ل دەڤەرا شنگالێ و بێ رەزامەندیا جڤاتا رۆحانیا ئێزدییان یا بلند دهێنە ئاڤاكرن و ژ رویێ ئاینی ڤە ئەڤ تشتە ببێ رەزامەندیا جڤاتا رۆحانیا ئێزدییان جهێ قەبوولكرنێ نینە و واتایا نەبوونا چ پیاو چاكەكی ل مەزارگەهێن دن یێن ئێزدییان، وەك مەزارێ میر شەرەف دین و پەرستگەها لالش و پیاو چاكێن دن یێن ئێزدییان ددەت، ژبەركو مەزارێن ئێزدییان هەموو مێرخاس و پیاو چاكێن ئێزدییان تێدانە و جهێن پیرۆزێن ئێزدییانە، لەوما دروستكرنا ڤان قوبان ل سەر تەرمێ چەند گەرێلایێن خوە ل چایێ شنگالێ سووكایەتی كرنە ب پیرۆزێن ئێزدییان .
دڤی دەرباری دە، نایف سەیدۆ، رێڤەبرێ ناحیا سنونێ، راگەهاند و هەولێن دروستكرنا ڤان هەردوو قوبان ژ لایێ پەكەكە ڤە پشت راستكرن و گۆت بەریا چەند رۆژان مجێورێ قوبا شێبل قاسم هاتیە جەم من وگۆتیە پەكەكە دخوازن دوو قوبان ل نیزیك مەزارێ شێبل قاسم دروست بكەت.
نایف سەیدۆ رێڤەبەرێ ناحیا سنونێ گۆتژی كو ل گور ئەو زانیاریێن من هەنە پەكەكە دێ ڤان هەردوو قوبان ل سەر هنەك كوشتیێن خوە دروستبكەت و بكەتە وەك مەزارگەه ل دەمەكی دا مزار تەنێ ب رەزامەندیا جڤاتا رۆحانیا ئێزدییان دهێنە دروستكرن و لە سەر پیاو چاك ومێر خاسێن ئێزدییان لەوما رێگری كرن ژی ل وان نە ل دەستێ مەدایە دڤێت جڤاتا رۆحانیا ئێزدییان بریارێ بدەت.
ل هەمان دەم دا رێڤەبەرییا گشتییا كاروبارێن ئێزدیان، دراگەهاندنەكێ دا كو كۆپیەك بۆ هەولێر شاندیە بەلاڤكریە،كو رێڤەبەرییا گشتییا كاروبارێن ئێزدیان ل وەزارەتا ئەوقافێ یا هەرێمێ هۆشداریێ ددەت وداخوازێ دكەت ب زووترین دەم كار ل وان قوبان بێتە سەكناندن یێن ب پشتەڤانیا حزبەكا سیاسی ل نێزیك مەزارێ شیبل قاسم ل دەڤەرا شنگالێ و بێ رازەمەندییا جڤاتا رۆحانیا ئێزدیان یا بلند هاتینە ئاڤاكرن
هەر وەها د راگەهاندنێ دا هاتیە كو ب دروستكرنا ڤان هەردوو قوبان تنێ مەرەما ڤێ حزبێ ئێزدیان نێزیكی خۆ كەتن و دترسین ئەڤ دیاردە ببتە چاڤلێكرن ل گەلەك جهێن دی ژی،كو دێ كارتێكرنێ ل ئێزدیاتیێ كەت.
هەر دڤێ رۆنكرنێ دا رێڤەبەرییا گشتییا كاروبارێن ئێزدیان داخوازێ ژ جڤاتا رۆحانیا ئێزدیان یا بلند كریە رۆلێ خۆ دڤی بابەتی دا ببین و رێگریێ ل ڤان لایەنان بكەت ڤی كاری ل شنگالێ ئەنجام بدەن.
ڕۆژناما "هەولێر" هەول دا پەیوەندیێ ب جڤاتا رۆحانیا ئێزدییان بكەت لێ ژبۆ ئەنجامدانا كارەكی خێرخوازیێ بۆ ئاوارەیێن ئێزدییان ل توركیا سەرەدانا وی وەلاتی كرینە، لەوما بابێ چاویش، یەك ژ زلامێن ئاینێ ئێزدییان داخویانی ل سەر دروستكرنا ڤان قوبان دا "هەولێر" و گۆت؛ كو دروستكرنا قوبان ژ رویێ ئاینی ڤە پێویستە جڤاتا رۆحانیا ئێزدییان بریار ل سەر بدەت و بۆ كەسی نینە ببێ رەزامەندیا وان كارەكی ب ڤی شێوەیی بكەت چمكو ژ رویێ ئاینی ڤە وەك سووكایەتی كرن ب پیرۆزێن ئێزدییان.
هەروەها، بابێ چاویش گۆت كو چێنابێ قوب ل سەر هەر كەسەكی بمرێ یان بهێتە كوشتن بهێتە دروستكرن،بەلكو دڤێت میرێ ئێزدییان وجاتا رۆحانی بریار ل سەر دروستكرنا قوبان بدەن چاوا بهێنە دروستكرن و لكێدەرێ بهێنە دروستكرن ول گور رێ ورسمێن ئێزدییان و ب ئاخا پەرستگەها لالش یا پیرۆز، ئەگەر نە خەلك چ باوەریێ پێ نادەت وبەریا نەها ل جۆرجیا قوبەك هاتە دروستكرن بۆ ئێزیدیێن جۆرجیا ئەوژی ب ئاخا لالش و رێ ورسمێن ئاینیێن ئێزدییان هاتنە چێكرن.
بابێ چاویش ئەو یەكژی دیاركر كو ئەڤ بابەت بێتر ب جڤاتا رۆحانی و میرێ ئێزدییان ڤە یێ گرێدایە و هەر دەما ڤەگەریان كوردستانێ دێ ڤی بابەتی گۆتۆبێژ بكەن وبریارەكێ ل سەر بدەن ئەڤ تشتە دێ بهێتە رەتكرن ژ رویێ ئاینی ڤە ژبەركو دڤێت دروستكرنا قوبا ب رێ ورسمێن تایبەت بێ و ب ئاخا پیرۆزا پەرستگەها لالش بهێتە دروستكرن و مجێورەكی ل گوری ئاینێ خوە بۆ دەستنیشان بكەن.
ل گور زانیارییان، پارتا كرێكارێن كوردستانێ "پەكەكە" جهێ دوو قوبان ل چیایێ شنگالێ نیزیك مەزارێ شێبل قاسم چێكرینە و، دێ ل سەر چەند كوشتیێن خوە بكنە مەزارگەهەك ل گور ئاینێ ئێزدییان ب مەرما كە خەلكێ ئێزدی بێتر نیزیكی وان ببێ لێ ل كارڤەدانێن دەستپێكی وسا دیاردبە كو جادیا ئێزدییان ژ ڤی كاری نەرازیە و رەنگە هەلویستەكی ئێزدییان یێ توند د هەمبەر چێكرنا ڤان قوبان هەبێت.
لە ڕۆژنامەی هەولێرەوە
