نووسینگەی حكوومەتی هەرێم لە دوبز، شێخان و كەركووك دەكرێتەوە
هەولێر-KDP.info- سەرۆكی دەستەی ناوچە كوردستانییەكانی دەرەوەی ئیدارەی هەرێمی كوردستان رایگەیاند، بڕیار وایە بەم زووانە سێ نووسینگە لە ناوچە كوردستانییەكانی دەرەوەی هەرێم بكەنەوە، كە پێشتر دوو نووسینگە لە دوبز و شێخان و دواتر نووسینگەیەكیش لە كەركووك دەكرێتەوە.
سەرۆكی دەستەی ناوچە كوردستانییەكانی دەرەوەی ئیدارەی هەرێمی كوردستان (نەسرەدین سەعید) بە ماڵپەری فەرمیی پارتیی دیموكراتی كوردستانی راگەیاند: "لە هەفتەی داهاتوودا نووسینگەی دەستەی ناوچە كوردستانییەكانی دەرەوەی ئیدارەی هەرێم، لە دوبز و شێخان دەكرێنەوە و پاشانیش هەمان نووسینگە لە كەركووكیش دەكرێتەوە".
(نەسرەددین) ئەوەیشی خستە ڕوو: "نۆ نووسینگەی دەسەتەكەمان لە چەند ناوچەیەكی دیكەی دەرەوەی ئیدارەی هەرێم هەیە و ژمارەیەكی دیكەیش بە فەرمی بۆ خزمەتكردنی خەڵكی ئەو ناوچانە دەكرێنەوە".
سەرۆكی دەستەی ناوچە كوردستانییەكانی دەرەوەی ئیدارەی هەرێمی كوردستان ئاماژەیشی دا، لە رێگەی ئەو نووسینگانەوە كێشە و داواكارییەكانی خەڵك لەو ناوچە كوردستانیانە دەگەیەندرێتە حكوومەتی هەرێم.
گوتیشی: "ئامانجمانە خزمەتی ئەو ناوچانە بكەین و بە تەنگ كێشەكانیانەوە بچین و گرفتەكانیشیان بگەیەنینە ئەنجوومەنی وەزیرانی هەرێمی كوردستان".
یەحیا سابیر
