وەزیری گەیاندنی عێراق: ئامادەین لەرووی پێوەندی و گەیاندنەوە هاوکاری هەرێم بکەین
هەولێر-KDP.info-وەزیری گەیاندنی حکوومەتی عیراقی فیدڕاڵ لە سەردانیدا بۆ لای سەرۆکوەزیرانی کوردستان رایگەیاند کە، وەزارەتەكەیان ئامادەیە هەموو هاوكارییەك لەگەڵ دەزگا پەیوەندارەكانی حكوومەتی هەرێمی كوردستان و كەرتی تایبەت لە بواری پێوەندی و گەیاندندا بكات.
ئێوارەی ئەمڕۆ پێنجشەممە 14/5/2015 (نێچیرڤان بارزانی) سەرۆكوەزیرانی هەرێمی كوردستان پێشوازی لە بەڕێز كازم حەسەن ئەلڕاشد وەزیری گەیاندنی عێراق و شاندێكی یاوەری كرد.
لە دیدارێكدا كە (مەولود باوە موراد) وەزیری گواستنەوە و گەیاندنی حكوومەتی هەرێمی كوردستان بە وەكالەت ئامادەی بوو، وەزیری گەیاندنی عێراقی پوختەیەكی دەربارەی كار و پڕۆژەكانی وەزارەتەكەی لە چوارچێوەی عێراق بە گشتی و بە تایبەتیش هاوكاری و هەماهەنگیی وەزارەت لەگەڵ وەزارەتی گواستنەوە و گەیاندنی حكوومەتی هەرێمی كوردستان و دەزگاكانی پێوەندی و گەیاندن پێشكەش كرد و ئاماژەی بەوە دا كە وەزارەتی گەیاندنی عێراقی بەرنامە و پلانی هەیە لە بوارەكانی پەیوەندی و گەیاندندا هاوكاری و هەماهەنگییەكی باشتر و هەمەلایەنەتر لەگەڵ دەزگا پەیوەندارەكان و كۆمپانیاكانی پەیوەندی و گەیاندن لە هەرێمی كوردستان بكات.
هەروەها جەختی لەوە كردەوە كە وەزارەتەكەیان ئامادەیە هەموو هاوكارییەك لەگەڵ دەزگا پەیوەندارەكانی حكوومەتی هەرێمی كوردستان و كەرتی تایبەت لە بواری پەیوەندی و گەیاندندا بكات، بۆ ئەمەش لە میانی ئەم سەردانەیدا لەگەڵ وەزارەتی گواستنەوە و گەیاندنی حكوومەتی هەرێمی كوردستان و چەندین دەزگا و كۆمپانیای پەیوەنداری ئەم بوارەدا كۆبووەتەوە و تیایاندا چۆنییەتی هاوكاری و هەماهەنگی نێوان وەزارەتی گواستنەوە و گەیاندن و دەزگاكان لە هەرێمی كوردستان لەگەڵ وەزارەتی گەیاندن و دەزگاكان لە عێراقی فیدراڵدا گفتوگۆ كردووە.
لای خۆیەوە سەرۆكوەزیرانی هەرێمی كوردستان خۆشحاڵی خۆی بە سەردانی بەڕێزیان پیشاندا و دووپاتی كردەوە كە حكوومەتی هەرێمی كوردستان و لایەنە پەیوەندارەكان بە خۆشحاڵیەوە پێشوازی لە هەر هاوكاری و هەماهەنگییەك لە نێوان دەزگاكانی بواری پەیوەندی و گەیاندن لە نێوان حكوومەتی فیدرال و حكوومەتی هەرێمی كوردستان دەكات و بۆ ئەمەش هەموو ئامادەییەكی حكوومەتی هەرێمی كوردستانی نیشاندا و ڕایگەیاند كە لایەنە پەیوەندارەكان لە حكوومەتی هەرێمی كوردستان ڕادەستپێرێت بۆ ئەوەی گرنگییەكی زیاتر بە هاوكاری و هەمانگی نێوان هەردوولا بدەن.
سەرۆكوەزیران هەروەها جەختی لەوەش كردەوە كە وێڕای كێشە و گرفتە سیاسییەكانی نێوان هەولێر و بەغدا، بەڵام وەزارەتە خزمەتگوزارییەكان دەتوانن هەمیشە هاوكاری و هەماهەنگیی لەنێوانیاندا هەبێت بۆئەوەی خزمەتگوزاریی باشتر بە تەواوی هاوڵاتیانی هەرێمی كوردستان و عێراق بكەن.
خستنە ڕوو و گفتوگۆكردنی بارودۆخی ئەمڕۆی عێراق و پرۆسەی سیاسی و پێشهاتە ئەمنی و سەربازییەكان و ڕووبەڕووبوونەوەی تیرۆر، لایەنێكی دیكەی دیدارەكە بوو.
