ڤاتیکان کۆمەکی هەرێمی بۆ ئاوارە کریستیانەکان بەرز نرخاند
هەولێر-KDP.info-سەرۆکی كۆمەڵگەی كەنیسەكانی ڕۆژهەڵات لە ڤاتیكان لە میانی سەردانی بۆ هەرێمی کوردستان و دیداری لەگەڵ سەرۆکوەزیرانی کوردستان دەڵێ، سوپاسگوزار بووم بەرانبەر بەو هەموو هاوكارییەی حكوومەت و خەڵكی هەرێمی كوردستان کە پێشكەیش به هەموو ئاوارە و لێقەوماوانی عێراق بە گشتی و ئاوارە كرستیانەكان بە تایبەتی ده‌یكه‌ن كە لە ترسی تیرۆر ڕوویان لە هەرێمی كوردستان كردووە.
پێشنیوەڕۆی ئەمڕۆ سێشەممە 5/5/2015 (نێچیرڤان بارزانی) سەرۆكوەزیرانی هەرێمی كوردستان پێشوازی لە (كاردینال لیۆناردۆ ساندری)، سەرۆكی كۆمەڵگەی كەنیسەكانی ڕۆژهەڵات لە ڤاتیكان و شاندێكی یاوەری كرد.
لە دیدارێكدا (كاردینال لیۆناردۆ) سڵاو و ڕێزی قەداسەتی پاپای ڤاتیكانی گەیاندە سەرۆكوەزیرانی هەرێمی كوردستان، هەروه‌ك سوپاسگوزار بوو بەرامبەر بەو هەموو هاوكارییەی حكوومەت و خەڵكی هەرێمی كوردستان پێشكەش به هەموو ئاوارە و لێقەوماوانی عێراق بە گشتی و ئاوارە كرستیانەكانیان بە تایبەتی ده‌یكه‌ن كە لە ترسی تیرۆر ڕوویان لە هەرێمی كوردستان كردووە.
هه‌روه‌ها تیشكى خسته سه‌ر ئه‌وه‌ى كە سەردانی كەمپی ئاوارە كرستیانه‌كان و كەنیسەكانی هەرێمی كردووە و لە نزیكەوە ئاگاداری ڕەوشی پەنابەران بووە كە لە كەشوهەوایەكی ئاسوودەدا ژیان بەسەر دەبەن و حكوومەتی هەرێمیش سەرەڕای ئەو بارگرانییەی بۆی دروست بووە، بە شێوەیەكی باش هاوكاری و خزمەتگوزاری پێگەیاندوون و بۆ ئەمەش سوپاسی دەزگاكانی حكوومەت و خەڵكی هەرێمی كوردستانی كرد.
لە بەشێكی دیكەی قسەكانیدا سەرۆكی كۆمەڵگەی كەنیسەكانی ڕۆژهەڵات باسی لە پرۆگرامی سەردانەكەی بۆ هەرێمی كوردستان و دیدار و كۆبوونەوەكانی لەگەڵ كەنیسەكانی هەرێم كرد و ئاماژەی بەوە دا كە بە وردی لێكۆڵینەوەی له ڕەوشی ئاوارە كرستیانەكان كردووە كە زۆربەیان ئاوارەی هەرێمی كوردستان بوون و لە دیدارەكانیدا ئاوارەكانی هان داوە كۆڵ نەدەن و خۆڕاگر بن و بەرەو هاندەران كۆچ نەكەن. لە هەمان كاتدا وەك ڤاتیكان داوا لە كۆمەڵگەی نێودەوڵەتی و ئێن جی ئۆكان و ئاژانسەكانی سەر بە نەتەوە یەكگرتووەكان دەكەن كە هاوكاریی زیاتری ئاوارەكان و هەرێمی كوردستان بە گشتی بكەن.
لای خۆیەوە (نێچیرڤان بارزانی) خۆشحاڵیی خۆی بۆ ئەو سەردانەی سەرۆكی كۆمەڵگەی كەنیسەكانی ڕۆژهەڵات لە ڤاتیكان دەربڕی و سوپاس و پێزانینی خۆی بۆ نامە تایبەتییەكەی قەداسەتی ڤاتیكان پیشان دا و باسی لە دوا سەردانی خۆی بۆ ڤاتیكان و دیداری لەگەڵ قەداسەتی پاپا كرد و دڵخۆشیی خۆی دەربڕی كە خوشك و برایانى كرستیان توانیویانە گەر بە شێوەیەكی كاتیش بێت هەرێمی كوردستان وەك ئارامگەیەكی حەوانەوە بەكار بهێنن تا ناوچەكانیان ئازاد دەكرێن و دەگەڕێنەوە سەر ماڵ و حاڵی خۆیان.
سه‌رۆكوه‌زیران دووپاتى كرده‌وه كه حكوومەتى هه‌رێمى كوردستان ئامادەیە بۆ پێشكەشكردنی هەر هاوكارییەك و سەرەڕای توانا سنووردارەكان، بەڵام حكوومەت لە پاراستن و هاوكاریكردنیان بەردەوام دەبێت. هەروەها ئاماژەی بە یەكڕیزی و یەكێتی و تەبایی و ئاشتیی كۆمەڵایەتی و پێكەوەژیانی هەموو نەتەوە و ئایینەكان لە هەرێمی كوردستان كرد كە لە ناوچەكەدا كەم وێنەیە.
لە تەوەرێكی دیكەی دیدارەكەدا بارودۆخی عێراق بە گشتی و بە تایبەتی بارودۆخی مووسڵ و ڕەوشی ئابووری و كۆمەڵایەتیی ناوچەكە گفتوگۆی لەسەر كرا و سەرۆكوەزیرانی هەرێمی كوردستان لە ڕێگەی كاردیناڵی كۆمەڵگەی كەنیسەكانی ڕۆژهەڵاته‌وه، سڵاو ڕێزی خۆی و به‌ڕێز سەرۆكی هەرێم و حكوومەت و خەڵكی كوردستانی بۆ قەداسەتی پاپای ڤاتیكان نارد و هیوای خواست لە داهاتوودا قەداسەتی پاپا سەردانی عێراق و هەرێمی كوردستان بكات.
