سه‌رۆك بارزانی یاسای سندووقی كوردستان بۆ داهاته نه‌وتی و گازییه‌كانی واژۆ كرد
هه‌ولێر-KDP.info- بەپێی راگەیندراوێکی پەرلەمانی کوردستان، سەرۆکی ھەرێمی کوردستان(سەرۆک بارزانی) یاسای سندووقی کوردستان بۆ داھاتە نەوتی و گازییەکان پەسەند کرد.
لە راگەیاندراوەکەدا کە کۆپیەکی بۆ ماڵپەری فەرمیی پارتیی دیموکراتی کوردستان نێردراوه، ھاتووە، پەرلەمانی کوردستان لە دانیشتنی ژمارە (٦)ی ئاساییی خۆیدا، لە رۆژی ١/٤/٢٠١٥، یاسای سندووقی کوردستان بۆ داھاتە نەوتی و گازییەکانی پەسەند کرد و ئاراستەی سەرۆکایەتیی ھەرێمی کوردستانی کرد بە مەبەستی واژۆکردنی، لای خۆشییەوە سەرۆکی ھەرێمی کوردستان بە بڕیاری ژمارە (٨)ـی ساڵی ٢٠١٥ لە ٣٠/٤/٢٠١٥ واژۆی لەسەر یاساکە کرد.
بەپێی ھەمان راگەیندراو، یاساکە پێک‌ھاتووە لە ١٦ ماددە و ھۆکارەکانی دەرچوواندنی و مەبەست لە دەرچوواندنیشی بە دامەزراوەییکردنی کەرتی نەوت و گازە لە ھەرێمی کوردستان کە بە شێوەیەک بێت داھاتەکانی پرۆسە نەوتی و گازییەکان بە باشترین شێوە کۆ بکرێنەوە و پشتیوانیی شەفافیەت گەشەی ئابووریی ھەرێمی کوردستان بێت.
بڵند ئیبراھیم
