نێچیرڤان بارزانی بەشداری لە یادی سەد ساڵەی چەنەقەڵادا كرد
ئیستانبوڵ-KDP.info-بە نوێنەرایەتی (مەسعود بارزانی) سەرۆکی هەرێمی کوردستان، بە داوەتێکی فەرمی تورکیا، سەرۆکوەزیرانی کوردستان بەشداری لە یادی سەد ساڵەی چەنەقەڵادا کرد.
بە نوێنەرایەتی (مەسعود بارزانی) سەرۆکی هەرێمی کوردستان و بە داوەتێکی فەرمیی وڵاتی تورکیا، ئەمڕۆ هەینی ٢٤-٢-٢٠١٥ (نێچیرڤان بارزانی) سەرۆکوەزیرانی هەرێمی كوردستان و شاندێكی یاوەری، لەگەڵ سەرۆك و شاندە فەرمییەکانی شەست وڵاتی دیكەی جیهان و بە ئامادەبوونی (ڕەجەب تەییب ئەردۆغان) سەرۆکكۆمار و (ئەحمەد داود ئۆغڵو) سەرۆکی حکوومەت و بەرپرسە باڵاکانی دەوڵەتی توركیا و چەندین کەسایەتیی ناودار، بەشدارییان لە ڕێوڕەسمی یادکردنەوەی سەد ساڵەی شەڕی چەنەقەڵادا لە شاری ئیستانبوڵ کرد.
جەنگی چەنەقەڵا لە 23ی نیسانی ساڵی 1915 و لە میانەی جەنگی جیهانیی یەکەمدا لە نێوان سوپای دەوڵەتی عوسمانی و هێزەكانی هاوپەیمانەكان لە گەرووی چەنەقەڵا ڕوویداوە و پەیامی ئەم یادکردنەوەیەش خواست و هەوڵدانی گەلانی ناوچەکە و جیهان بۆ ئاشتی و پێکەوەژیان و ڕێگریكردن لە دووبارەبوونەوەی جەنگە کارەساتهێنەکان بووە.
