ئەحمەد ساڵحی: رەخنەكانی كالكان بە مەبەستی ڕووخاندنە.. شەڕ لە لێدوانی توندەوە هەڵدەگیرسێت
سلێمانی-KDP.info- ئەندامێكی كۆمیتەی ناوەندیی كۆمەڵە دەڵێ، لێدوانەكەی (دوران كاڵكان) خزمەت بە یەكڕیزیی گەلی كورد ناكات و بگرە زیانیشی هەیە. باوەڕیشی وایە كە شەڕ لە لێدوانی توندەوە هەڵدەگیرسێت.
ئەندامی كۆمیتەی ناوەندیی كۆمەڵە- رێكخراوی کوردستانی حزبی كۆمه‌نیستی ئێران (ئەحمەد ساڵحی) بە ماڵپەڕی فەرمیی پارتیی دیموكراتی كوردستانی ڕاگەیاند: "لێدوانەكەی (دوران كاڵكان) خزمەت بە یەكڕیزیی گەلی كورد ناكات و بگرە زیانیشی هەیە، خۆ هەموو كەس دەتوانێت رەخنە بگرێت، بەڵام رەخنەی بنیاتنەر نەوەك ئەو قسانەی (دوران كاڵكان) كە بۆ ڕووخاندنە؛ هەرێمی كوردستان و تەواوی وڵاتانی جیهان بێكەموكوڕی نین و دەكرێت رەخنە لە سسیستەمی هەرێمی كوردستانیش بگیرێت، بەڵام نەوەك بەو شێوەیەی (كاڵكان)، چونكە شەڕ لە لێدوانی توندەوە هەڵدەگیرسێت، بەڵام لە توانا و قازانجی پەكەكەدا نییە كە شەڕی ناو‌خۆ بە لێدوانێكی (دوران كاڵكان) هەڵبگیرسێت".
(ساڵحی) گوتیشی: "با دیموكراتییەكە ئەوەندە فراوان بێت كە ئەوەی دەیەوێت قسەی ناخۆشیش بكات با بیكات ئەگەر قسەكانی مەنتیقی بێت، بەڵام ئەگەر قسەی نامەنتیقی بە خۆشیش بكرێت، هەر جێپەنجەی خراپ جێ دەهێڵێت".
سەرباز واحد
