داعش 25 هاووڵاتیی شه‌به‌ک و تورکمانی گولـلەباران کردن.. به بۆردوومانی پێشمه‌رگه 6 داعش کوژران
مووسڵ-KDP.info- سه‌رچاوه‌یه‌کی به‌رپرس دەڵێت، چەكدارانی داعش 25 هاووڵاتییان لە زیندانی بادۆش گولـلەباران كردوون و 30 مەلایشیان لە مزگەوتەكان دوور خستوونەتەوە. گوتیشی، ئەمڕۆ هێزه‌کانی پێشمەرگە مۆڵگەكانی داعشیان لە میحوەری ناوەران بۆردوومان كردوون و لە ئاكامدا شەش چەكدار كوژراون.
بەرپرسی راگەیاندنی لقی چواردەی پارتیی دیموكراتی كوردستان لە مووسڵ (سەعید مەموزینی) بە kdp.info-ی راگەیاند، ئەمڕۆ 25 هاووڵاتی كە شەبەك و توركمانی شیعەن، لە زیندانی بادۆش لەلایەن داعشەوە گولـلەباران كراون و دواتریش گەیەندراونەتە پزیشكی دادیی مووسڵ.
(مەموزینی) زیاتر گوتی، هەر ئەمڕۆ چەكداران بڕیاری دوورخستنەوەی30 ماموستای ئایینیان لە گوتاردان و پێشونێژكردن و بانگدان لە مزگەوتەكانی مووسڵ داوە، ئەمەیش بە هۆی پابەندنەبوون بە فەرمانەكانی داعشەوە.
ئەو گوتیشی، ئەمڕۆ هێزه‌کانی پێشمەرگە مۆڵگەكانی داعشیان لە میحوەری ناوەران بۆردوومان كردوون و لە ئاكامدا شەش چەكدار كوژراون.
نه‌شوان به‌رزنجی
