له ڕۆژی جیهانیی گەشت، ماڵپه‌ڕی KDP گه‌شه‌ی گەشتیاریی هەرێمی کوردستان ده‌خاته‌ڕوو
ھەولێر-KDP.info- لە کابینەی نۆیەم و بە بەهای زیاتر لە 7.5 ملیار دۆلار، 80 پرۆژەی گەشتیاریی نوێ جێبەجێ کراون، کە بووەتە هۆی گەشەکردنی ژێرخانی کەرتی گەشتیاری و ڕاکێشانی ژمارەیەکی زۆر گەشتیار.
ئەمڕۆ شەممە 27ـی ئەیلوول، حکوومەتی هەرێمی کوردستان بڵاوی کردەوە، ئەمڕۆ ڕۆژی جیهانیی گەشتە و لەلایەن ڕێکخراوی گەشتیاریی جیهانیی سەر بە نەتەوە یەکگرتووەکانەوە دیاری کراوە، ئەم ڕۆژە وەک ئاماژەیەک بۆ گرنگیی کەرتی گەشتیاری لە ئابووری و پەرەپێدانی وڵاتان و ناوچەکان دادەنرێت.
حکوومەتی هەرێمی کوردستان لە کابینەی نۆیەمدا، هەنگاوی گەورەی ناوە بۆ بەهێزکردنی کەرتی گەشتیاری و گەشەپێدانی ژێرخانەکەی. لەو ماوەیەدا، 80 پڕۆژەی گەشتیاریی نوێ بە گوژمەی 7 ملیار و 555 ملیۆن و 305 هەزار دۆلار جێبەجێ کراون. ئەم پڕۆژانە بووەتە هۆی دروستبوونی هەلی کار و بووژاندنەوەی زیاتری ئابووریی هەرێم.
هەرێمی کوردستان خاوەنی زیاتر لە 3,000 شوێن و بنکەی گەشتیارییە، کە ئەمانەی خوارەوە بەشێکن لەوان:
هۆتێل: 480
مۆتێل: 282
کۆمەڵگه‌ی گەشتیاری: 44
گوندی گەشتیاری: 20
ڕێستۆڕانت و خواردنی خێرا: نزیکەی 1,000
کافتریا: نزیکەی 700
شاری یاری: 28
ئەم گەشەپێدانە، کە هاوکاتە لەگەڵ گەشەی ژێرخان و ڕێگەوباندا، بووەتە هۆی زیاتر ڕاکێشانی گەشتیارانی ناوەوە و دەرەوە و بووژاندنەوەی کەرتەکە، کە ساڵانە زیاتر لە 7 بۆ 8 ملیۆن کەس گەشتی کوردستان دەکەن. ئەمەش نیشانەی سەرکەوتنی سیاسەتەکانی حکوومەتی هەرێمە لە پەرەپێدانی کەرتی گەشتیاریدا و وادەکات کوردستان ببێتە شوێنێکی سەرنجڕاکێش بۆ گەشتیاران لە ناوچەکە و جیهاندا.
