"نووسراوی پڕۆژەی دروستکردنی سێ دەریاچە لەشاری ھەولێر ڕەوانەی ئەنجوومەنی وەزیران کراوە"

بەڕێوەبەری ئاودێری پارێزگای ھەولێر ئاشکرایکرد، پڕۆژەی دروستکردنی سێ دەریاچە لە شاری ھەولێر کاری لەسەر دەکرێت، پڕۆژەکە ڕەوانەی سەرۆکایەتی ئەنجوومەنی وەزیران کراوە بۆ پێداچوونەوە و بڕیار لەسەردان.

ڕێبوار کاکەیی، بەڕێوەبەری ئاودێری ھەولێر بە ماڵپەڕی فەرمیی پارتی دیموکراتی کوردستانی راگەیاند: ساڵانی ڕابردوو پلانێک ھەبوو سێ دەریاچە لە شاری ھەولێر دروست بکرێن، ئێستاش پڕۆژەکە بەردەستە و پێیدا دەچینەوە بۆ جێبەجێکردن، چونکە پڕۆژەکە پێویستی بە پارەیەکی زۆر ھەیە و ڕەوانەی سەرۆکایەتی ئەنجوومەنی وەزیران کراوە تا بڕیاری لەسەر بدرێت و وەزارەتی دارایی و ئابووریش پارەی پێویست بۆ جێبەجێکردنی خەرج بکات.

بەڕێوەبەری ئاودێری پارێزگای ھەولێر گوتیشی: پڕۆژەکە سێ دەریاچەی گەورە لە خۆ دەگرێت و بڕیارە ئاوی لە زێی گەورە یانیش لە بەستۆڕە بۆ دابین بکرێت، جێبەجێکردنی ئەو پڕۆژەیە کاریگەری زۆری دەبێت لەسەر ھەولێر.

ڕێبوار کاکەیی ڕوونی کردەوە: حکوومەتی ھەرێمی کوردستان بڕیاری داوە زیاتر لە ٢٠ پۆندی دیکە لە سنووری ھەولێر جێبەجێ بکرێن و لەوانەش ٢١ پۆند بڕیاریان بۆ دەرچووە، حەوت پۆندی دیکەش پەسەندکراون و دەچنە بواری جێ بەجێکردن.

قائید میرۆ