جادەکا نوی یا 30 مەتری ل دهۆکێ دێ هێتە ڤەکرن

دهۆک -KDP.info- د بەردەوامیا چێکرنا پرۆژێن نوی یێن خزمەتگۆزاری دا بتایبەت یێن کو د ناڤ سەنتەرێ باژێڕێ دهۆکێ دا دهێنە چێکرن، ل دەمەکێ نێزیک دێ دەست ب ڤەکرن و قێڕکرنا جادا 30 مەتری ل تاخێ ماسیکێ یێ د ناڤ سەنتەرێ باژێڕێ دهۆکێ دا هێتەکرن.

ئیسماعیل مستەفا، بەرپرسێ پەیوەندی و ڕاگەهاندنێ ل سەرۆکاتیا باژێڕڤانیا دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو  ڕەزامەندی ل سەر پرۆژێ ڤەكرن و قێڕكرنا جادا 30 مەتری ل کەرتێ 45 ل تاخێ ماسیكێ یێ د ناڤ سەنتەرێ باژێڕێ دهۆکێ دا هاتیەکرن و ل دەمەکێ نێزیک دێ کەڤیتە د بوارێ بجهئینانێ دا و گۆت: "كۆژمێ نێزیكى سێ ملیار دیناران ژ بۆدجا پارێزگەها دهوكێ یا سالا 2022 بۆ ڤی پرۆژەیی هاتیە تەرخانکرن.

ناڤهاتی ئاماژە دا وێ چەندێ کو ئەڤ جادە ب درێژاهیا دو هزار و 200 مەتران و ب فرەهیا 30 مەتران دێ ل نێزیکی مزگەفتا (سەباح ملحەم)ی دەستپێکەت هەتا دگەهیتە جادا 30 مەتری یا تاخێ زرکا و گۆت: "ئەڤ پرۆژە دێ ب سەرپەرشتیا سەرۆکاتیا باژێرڤانیا دهۆکێ ژ لایێ کۆمپانیەکێ ڤە هێتە بجهئینان و 300 رۆژ بۆ ب دووماهی هاتنا ڤی پرۆژەیی هاتینە دەستنیشانکرن".

 

رێوار محەمەد رەشید