ئه‌ڤرۆ دادگه‌ها كارگێرى ل دهۆكێ هاته ڤه‌كرن
دهۆك-KDP-د رێوره‌سمه‌كى دا ئه‌ڤرۆ رۆژا پێنجشه‌مبى 25/8/2022 دادگه‌ها كارگێرى ل پارێزگه‌ها دهۆكێ ب ئاماده‌بوونا (فه‌رسه‌ت ئه‌حمه‌د) وه‌زیرێ داد ل حكومه‌تا هه‌رێما كوردستانێ و (د.عه‌لى ته‌ته‌ر) پارێزگارێ دهۆكێ د ناڤ ئاڤاهیێ سه‌رۆكاتیا دادگه‌ها تێهه‌لچوونا دهۆكێ دا هاته ڤه‌كرن.
فه‌رسه‌ت ئه‌حمه‌د، وه‌زیرێ داد ل حكومه‌تا هه‌رێما كوردستانێ د په‌یڤه‌كێ دا دیار كر كو پشتى ده‌لیڤه په‌یدابوویى و كارێن پێدڤى هاتینه ئه‌نجامدان ئه‌ڤرۆ دادگه‌ها كارگێرى ل پارێزگه‌ها دهۆكێ هاته ڤه‌كرن، پێدڤیه بڕیارێن ڤێ دادگه‌هێ ئاسانتر بهێنه ده‌ركرن، هه‌روه‌سا پێرابوونێن ڤێ دادگه‌هێ ژى ئاسانتر بن، ژ به‌ر كو به‌رى نوكه گه‌له‌ك ژ وه‌لاتیان ده‌ست ژ مافێ خوه به‌رددا و ئه‌و شیان نه‌بوون سه‌ره‌دانا دادگه‌ها كارگێرى ل پارێزگه‌ها هه‌ولێرێ بكه‌ن و مه‌زاختیێن هاتنوچوونێ بده‌ن و گۆت: "چار دادوه‌ر ل دادگه‌ها كارگێریا دهۆكێ هاتینه دانان كو جهێ باوه‌ریا مه و یا وه‌لاتیانه، هیڤیه ئه‌م هه‌مى پێكڤه بشێن ڤێ دادگه‌هێ بسه‌ربێخین ژ به‌ر كو ئارمانجا مه هه‌میان سه‌روه‌ریا یاسایێ یه".
د.عه‌لى ته‌ته‌ر، پارێزگارێ دهۆكێ د په‌یڤه‌كێ دا ئاشكرا كر كو ڤه‌كرنا دادگه‌ها كارگێرى ل پارێزگه‌ها دهۆكێ ئێك ژ وان خزمه‌تێن باشه كو ژ لایێ حكومه‌تا هه‌رێما كوردستانێ ڤه پێشكێشى خه‌لكێ پارێزگه‌ها دهۆكێ هاتیه‌كرن، وه‌كو ئیدارا پارێزگه‌ها دهۆكێ د ئاماده‌ینه هه‌مى جوره هاریكاریه‌كێ پێشكێشى ڤێ دادگه‌هێ بكه‌ین و گۆت: "رێز دێ ل هه‌ر بڕیاره‌كێ هێته گرتن یا كو ژ ڤێ دادگه‌هێ دهێته ده‌ركرن و وه‌لاتیێن مه ژى بلا د پشتراست بن و په‌نایێ بۆ ڤێ دادگه‌هێ بینن، په‌یره‌وكرنا یاسایێ بتایبه‌تى ژ لایێ ده‌ستهه‌لادارێن حكومه‌تا هه‌رێما كوردستانێ ڤه بۆ مه سه‌ربلندیه‌كا مه‌زنه نه‌بتنێ ل سه‌ر ئاستێ ناڤخۆیى دا به‌لكو ل سه‌ر ئاستێ جیهانێ ژى".
رێوار محه‌مه‌د ره‌شید
