مەکتەبی سیاسی پارتی: پشتیوانی خۆمان بۆ داوا و خواستە رەواکانی کرێکاران دووپات دەکەینەوە
ھەولێر-KDP.info- مەکتەبی سیاسی پارتی دیموکراتی کوردستان بە بۆنەی (١ی ئایار) جەژنی جیهانی کرێکاران پەیامێکی بڵاوکردەوە و دەڵێت، رۆڵی بونیادنەرانەی کرێکارانی ئازیزی کوردستان بەرز دەنرخێنین و پشتیوانی خۆمان بۆ داوا و خواستە رەواکانیان دووپات دەکەینەوە بۆ دەستەبەرکردنی ژیان و گوزەرانێکی شایستە و خۆشگوزەران بۆ خۆیان و خانەوادەکانیان.
دەقی پەیامی مەکتەبی سیاسی پارتی دیموکراتی کوردستان:
پەیامی پیرۆزبایی مەکتەبی سیاسی پارتی دیموکراتی کوردستان بە بۆنەی جەژنی جیهانی کرێکاران
بە بۆنەی (١ی ئایار) جەژنی جیهانی کرێکاران، پیرۆزباییەکی گەرم لە تێکڕای کرێکارانی کوردستان و جیهان دەکەین و، ئومێدەوارین هەردەم خاوەنی راستەقینەی پەیامی راست و دروستی خۆیان بن بۆ بەدیهاتنی مافەکانیان.
بەدرێژایی مێژووی خەبات و شۆڕشی گەلانی ئازادیخواز نکوڵی لە پێگە و تێکۆشان و رۆڵی چینی کرێکاران ناکرێ، کە گرنگی و کاریگەری خۆی هەبووە لە گۆڕانکاری و بەرەوپێشچوونی کۆمەڵگا و وڵاتان و ئەو دەسکەوتانەی بەدەستیان هێناوە، هەروەها لە رووی بیناکردن و ئاوەدانکاریدا هەمان بایەخ و کاریگەریان هەیە و لەو رێگایەشدا قوربانی زۆریان داوە.
بەو بۆنەیەوە و لەو دەرفەتەدا رۆڵی بونیادنەرانەی کرێکارانی ئازیزی کوردستان بەرز دەنرخێنین و پشتیوانی خۆمان بۆ داوا و خواستە رەواکانیان دووپات دەکەینەوە بۆ دەستەبەرکردنی ژیان و گوزەرانێکی شایستە و خۆشگوزەران بۆ خۆیان و خانەوادەکانیان، هەروەها هیوادارین بە هەموو لایەک لە چین و توێژەکانی کۆمەڵگاکەمان هەوڵ بدەین بۆ بووژانەوە و بونیادنان و بەرەو پێشبردنی زیاتری وڵاتەکەمان.
جارێکی دیکە پیرۆزبایی(١ی ئایار)جەژنی جیهانی کرێکاران لە تێکڕای کرێکارانی کوردستان پیرۆز بێت..
مەکتەبی سیاسی پارتی دیموکراتی کوردستان
١ـی ئایاری ٢٠٢٢
