دەستەی ژینگەی ھەرێم: پێشنیار کراوە ئەوانەی ژینگە ناپارێزن سزا بدرێن
__2022_03_30_h15m40s31__ER.jpg)
ھەولێر-KDP.info- بەڕێوەبەری ھونەری لە دەستەی ژینگەی ھەرێمی کوردستان گوتی، پێشنیار کراوە کە ئەوانەی دەچنە گەشت و سەیران ئەگەر شوێنی خۆیان، پاک نەکەنەوە و ژینگە نەپارێزن، سزا بدرێن.
بەڕێوەبەری ھونەری لە دەستەی ژینگەی ھەرێمی کوردستان، ئازاد نووری عەوڵا، بۆ ماڵپەڕی فەرمیی پارتی دیموکراتی کوردستان گوتی: ''پێشنیارێک کراوە لەلایەن دەستەی ژینگەوە بۆ ئەوەی ژینگە بە شێوەیەکی پاک و خاوێن بپارێزرێت و ئەو خێزانانەی دەچنە گەشت و سەیران بۆ ناوچە گەشتیارییەکان ناچار بکرێن شوێنی خۆیان پاک بکەنەوە، ئەویش لە ڕێگەی دروستکردنی تیم و چاودێریی خەڵک بکەن، ھەر خێزانێک شوێنی خۆی پاک نەکردەوە، پسوولەیەکی بۆ بکەن و بە بڕی ٥ ھەزار دینار سزا بدرێن و ئەگەر پاکیشیان کردەوە پارەکەیان پێ بدرێتەوە.''
ئازاد نووری عەوڵا گوتیشی: ''ئەمە ھەنگاوێکی باشە بۆ ئەوەی ژینگە و سروشتی کوردستان بپارێزرێت و خەڵک شوێنی خۆی لە پاشماوەکان پاک بکاتەوە، بەڵام ئەمە جارێ پێشنیارە و بڕیار نییە تاوەکوو بچێتە بواری جێبەجێکردنەوە ،چونکە پێویستە دەستەی گشتیی گەشتوگوزار بڕیاری لێ بدات.''
بڵند ئیبراھیم
