ژمارەکا پرۆژان ل چەمانکێ ھاتنە ڤەکرن و بەرێ بنیاتی بۆ ھندەکێن دی ھاتە دانان
دھۆک-KDP.info- د بەردەوامیا ڤەکرنا پرۆژێن نوی یێن خزمەتگۆزاری ل دەڤەرێن جودا یێن سنوورێ پارێزگەھا دھۆکێ ئەڤرۆ رۆژا سێشەمبی ١١/١/٢٠٢٢ ژمارەکا پرۆژێن خزمەتگۆزاری ژ لایێ (د. کەمال ئەترووشی) وەزیرێ سامانێن سرۆشی یێ حکومەتا ھەرێما کوردستانێ و (پ. د. عەلی تەتەر) پارێزگارێ دھۆکێ ڤە ل سنوورێ ناحیا چەمانکێ یا سەر ب قەزا ئامێدیێ ڤە ھاتنە ڤەکرن و د ھەمان دەم دا بەرێ بنیاتی بۆ ژمارەکا پرۆژێن دی ل ناحیا ناڤھاتی ھاتە دانان.
د.کەمال ئەترووشی، وەزیرێ سامانێن سرۆشی یێ حکومەتا ھەرێما کوردستانێ د کۆنگرەکێ رۆژنامەڤانی دا دیار کر کو ئەڤرۆ ٢٥ کیلومەترێن رێیا ھەشت گوندان ل ناحیا چەمانکێ ھاتە ڤەکرن، ھەروەسا قوتابخانەکا ناوەندی کو چەندین تاقیگەھێن باش د ناڤ دا ھەنە و پارکەکا گشتی ژی ل ناحیا ناڤھاتی ھاتنە ڤەکرن و چەندین پرۆژێن دی یێن خزمەتگۆزاری د رێ دانە ل ئایندەکێ نێزیک ل ڤێ دەڤەرێ بھێنە چێکرن و گۆت: " بۆ ڤان پرۆژێن ھاتینە چێکرن ھەماھەنگیەکا باش دناڤبەرا وەزارەتا سامانێن سرۆشی یا حکومەتا ھەرێما کوردستانێ و کۆمپانیا HKN یا پەترۆلێ دا ھەیە کو ڤێ کۆمپانیێ سەرەرایی ئەنجامدانا چەندین پرۆژان ل دەڤەرێ د ئەڤ سالادا ٤٥٠ دەلیڤێن کاری بۆ ٤٥٠ کەسان ژ خەلکێ دەڤەرا چەمانکێ پەیداکرینە".
پ. د. عەلی تەتەر، پارێزگارێ دھۆکێ د ھەمان کونگرێ رۆژنامەڤانی دا ئاشکرا کر کو ئەو پرۆژێن ئەڤرۆ ل ناحیا چەمانکێ سەرەدانا وان ھاتیەکرن و ھاتینە ڤەکرن و بەرێ بنیاتی بۆ ھاتیەدانان ھندەک ژ لایێ وەزارەتا سامانێن سرۆشتی یا حکومەتا ھەرێما کوردستانێ ب ھەماھەنگی دگەل کۆمپانیا HKN یا پەترۆلێ ھاتینە بجھئینان و ھندەکێن دی ژی ل سەر بۆدجا پەرەپێدانا پارێزگەھا دھۆکێ ژ لایێ حکومەتا ھەرێما کوردستانێ ڤە ھاتینە بجھئینان و دێ ھەمی بزاڤان کەین خزمەتگۆزاریێن زێدەتر بۆ ڤێ دەڤەرێ و ھەمی دەڤەرێن دی یێن سنوورێ پارێزگەھا دھۆکێ دابین کەین، ژ بەر کو ھەکە بزاڤا خۆشکرنا گوندان بھێتەکرن دڤێت خزمەتگۆزاری بۆ بھێنە دابینکرن، ئەڤە ددەمەکی دایە ل سالا بۆری ب کوژمێ پتری حەفت ملیار دیناران پرۆژێن خزمەتگۆزاری ل ڤێ دەڤەرێ ھاتبوونە ئەنجامدان.
رێوار محەمەد رەشید
