9 پڕۆژەی ڕێگاوبان لە ھەولێر جێبەجێ دەکرێت

ھەولێر -KDP.info- بەڕێوەبەری چاککردنەوەی ڕێگاوبانی ھەولێر گوتی، لە چوارچێوەی ئەو پارەیەی بۆ پارێزگای ھەولێر تەرخان کراوە، زیاتر لە ٢ملیار دینار بۆ ٩ پڕۆژەی چاککردنەوەی ڕێگاوبان تەرخان کراوە و ڕەزامەندیی لەسەر دراوە و ئێستا ڕێکارەکان بۆ جێبەجێکردنی دەگیرێتە بەر.

عیماد محەمەد، بەڕێوەبەری چاککردنەوەی ڕێگاوبانی ھەولێر، بۆ ماڵپەڕی فەرمیی پارتی دیموکراتی کوردستان گوتی: "لە سنووری پارێزگای ھەولێر بەگومەژی زیاتر لە دوو ملیار دینار بە شێوەی بەڵێندەرایەتی ٩ پڕۆژەی ڕێگاوبان لە بواری چاککردنەوە جێبەجێ دەکرێت و دەست بە ڕێکارەکانی جێبەجێکردنیان کراوە.''

عیماد محەمەد گوتیشی: "ئەو پڕۆژانەمان بەسەر ھەموو قەزا و ناحیەکاندا دابەش کردووە لە سنووری پارێزگای ھەولێر و ڕێکارەکان تەواو بن دەست بە جێبەجێکردنیان دەکرێت، چونکە حکوومەت ڕەزامەندیی لەسەر داوە و ئەو گوژمە پارەیەی بۆ تەرخان کراوە و ئەو ڕێگاوبانانەی پێویستیان پێی ھەبێت، نوژەنیان دەکەینەوە."

محەمە  باسی لەوەش کرد: "تەرخانکردنی ئەو پارەیەش لە چوارچێوەی ئەو ٢٨ملیار دینارەیە کە بۆ پارێزگای ھەولێر تەرخان کراوە و پشکی ئێمەشی لێ دەدرێت."

حکوومەتی ھەرێمی کوردستان پارەی بۆ جێبەجێکردنی پڕۆژە بۆ ھەموو پارێزگاکان لە ھەرێمی کوردستان تەرخان کردووە، لەوانەش پارێزگای ھەولێر کە پشکەکەی ٢٨ملیار دینارە و بەسەر ھەموو کەرتەکاندا دابەش کراوە.

 

بڵند ئیبراھیم