رێژەی بەشداریکردن لە سنووری پارێزگای ھەولێر ٦٠%ی تێپەڕاند

هەولێر-KDP.info- لە سنووری پارێزگای ھەولێر ٦٠%ی دەنگدەران بەشداریی بایۆمەتری دەنگدانیان کردووە و، بەرپرسی کۆمسیۆنی باڵای ھەڵبژاردنەکانی عێراقیش لە ھەولێر دەڵێ، پڕۆسەکە تا ١ی نیسان بەردەوامی دەبێت و ژمارەیەک کارمەندی نوێش دادەمەزرێن.

عەبدولڕەزاق موشیر، بەڕێوەبەری ئوفیسی پارێزگای ھەولێری کۆمسیۆنی باڵای هەڵبژاردنەکانی عێراق، بە ماڵپەڕی فەرمیی پارتی دیموکراتی کوردستانی راگەیاند: "پڕۆسەی نوێکردنەوەی تۆماری دەنگدەران بەردەوامە و رۆژانە تیمەکانی کۆمسیۆن لە ھەموو ناوچەکانی سنووری پارێزگای ھەولێر سەرقاڵی ئەنجامدانی بایۆمەتریی دەنگدەران و نوێکردنەوەی تۆماری دەنگدەرانن لەو کێشانەی ھەیانە".

بەرپرسەکەی کۆمسیۆن گوتیشی: "رێژەی بەشداریکردن لە سنووری پارێزگای ھەولێر گەیشتووەتە ٦٠%ی دەنگدەران و دەتوانم بڵێم سەرووی ئەو رێژەیەش تۆمار کراوە، پڕۆسەکەش بەپێی بڕیاری کۆمسیۆن تا سەرەتای مانگی نیسانی داھاتوو بەردەوام دەبێت".

موشیر جەختیشی کردەوە: "بەپێی بڕیارێک، ژمارەی کارمەندانی کۆمسیۆن بۆ دوو مانگی دیکە زیاد دەکرێت بە مەبەستی بەڕێوەبردنی کاروباری کۆمسیۆن لە نوێکردنەوەی تۆماری دەنگدەران و، بڕیارە ژمارەیەک کارمەندی نوێ بە گرێبەست دابمەزرێن".

 

قائید میرۆ