د سالا بۆری دا باژێرڤانیێن دھۆکێ ب کۆژمێ ٣٦ ملیار دیناران پرۆژە ئەنجامداینە
دھۆک-KDP.info- رێڤەبەرێ گشتی یێ باژێرڤانیان ل پارێزگەھا دھۆکێ ئاشکرا کر کو د سالا ٢٠٢٠ دا وان چەندین پرۆژێن خزمەتگۆزاری ب کۆژمێ ٣٦ ملیار دیناران ل سنوورێ رێڤەبەریا گشتی یا باژێرڤانیان ل پارێزگەھا دھۆکێ ئەنجامداینە و گۆت: "د ھەمان سال دا داھاتێ باژێرڤانیان ل سنوورێ پارێزگەھا دھۆکێ ٥٢٥ ملیۆن دیناربوون".
ئەندازیار دیار بەحری رەسول، رێڤەبەرێ گشتی یێ باژێرڤانیان ل پارێزگەھا دھۆکێ ئەڤرۆ رۆژا ٧/١/٢٠٢١ د پرێس کۆنفرانسەکی دا دیار کر کو د سالا ٢٠٢٠ێ دا ٧٤ پارچێن ئەردی ل سەر خێزانێن شەھید و ئەنفالکریان و زیندانیێن سیاسی و قەرەبوویان ھاتینە بەلاڤکرن، ھەروەسا د ھەمان سال دا ژ سەرجەمێ ٤٧ سەرۆک باژێرڤانیان ٢٥ ژوان ھاتینە گوھۆڕین".
ناڤھاتی ئاماژە دا وێ چەندێ " د سالا بۆری دا وان ٧٦ پرۆژە ب کۆژمێ ٣٢ ملیار دیناران ل سنوورێ رێڤەبەریا گشتی یا باژێرڤانیان ل پارێزگەھا دھۆکێ ئەنجام داینە، ھەروەسا ل سەر پێشینەیێن ھەیڤانە یێن باژێرڤانیا ب کۆژمێ چار ملیار دیناران پرۆژە ھاتینە ئەنجامدان".
رێڤەبەرێ گشتی یێ باژێرڤانیان ل پارێزگەھا دھۆکێ خویا کر کو د سالا بۆری دا ھزار مۆلەتێن نوی یێن ئاڤاکرنێ و ١٠٤ مۆلەتێن بازرگانی ھاتینەدان و د ھەمان سال دا ٤٨٤ زێدەگاڤی ھاتینە تۆمارکرن.
رێوار محەمەد رەشید
