وەزیری بازرگانی بۆ KDP: ئەم جارە عەدالەت دەچەسپێت.. دوو مووچەیی كۆتایی دێت

هەولێر-KDP.info- لە سەرەتای ئەم مانگەوە، یاسای چاكسازی خراوەتە بواری جێبەجێكردنەوە، وەزیرێكی بزووتنەوەی گۆڕانیش لە حكوومەتی ھەرێمی كوردستان پێی وایە، ئەم جارە كۆدەنگی لەسەر چاكسازی ھەیە و عەدالەتیش دەچەسپێت.

كەمال موسلیم، وەزیری بازرگانی، بە ماڵپەڕی فەرمیی پارتی دیموكراتی كوردستانی راگەیاند: "جێبەجێكرنی یاسای چاكسازی وەك خۆی، جێگەی خۆی دەگرێت، بەوەی كە بەدیھێنانی عەدالەتە لەنێو فەرمانبەراندا و ئەوانەیشی بە ناحەق سوودمەند بوونە، لادەبرێن، بێگومان بە ھۆی چاكسازییەوە داھاتێكی زۆریش بۆ حكوومەتی ھەرێمی كوردستان دەگەڕێتەوە، چونكە خەڵكێكی زۆر بە ناشایستەیی خانەنشین بوونە و ھەموو ئەوانە و بندیوار و دوو مووچەییش كۆتاییان دێت".

وەزیری بازرگانی و پیشەسازی ئاماژەی بۆ ئەوەش كرد: "سەرۆكایەتیی ئەنجوومەنی وەزیران لەبارەی رەوشی ئێستا و ئەنجامدانی چاكسازی، بەردەوام و هەفتانە كۆبووەتەوە".

لەبارە كۆدەنگی بۆ جێبەجێكردنی چاكسازی، موسلیم جەختی كردەوە: "بڕیاری چاكسازی لەلایەن سەرۆكایەتیی ئەنجوومەنی وەزیرانەوە دەرچووە و ھەموومان دەنگمان بۆ چاكسازی داوە، ئەگەر كۆدەنگی لەسەر نەبێت، بۆچی دەنگی بۆ دەدەین، واتە كۆدەنگی لەسەر چاكسازی ھەبووە و ھەموو ئەندامانی ئەنجوومەنی وەزیران دەنگیان بۆ جێبەجێكردنی چاكسازی داوە".

دەشڵێت: "چەندین كۆبوونەوەی سەرۆكایەتیی ئەنجوومەنی وەزیران بۆ دەركردنی چاكسازی تەرخان كرابوون و دوای وردەكارییەكی زۆر، ئینجا دەنگی لەسەر دراوە بۆ جێبەجێكردن".

 

قائید میرۆ