بەرپرسی پەیوەندییەکانی دەرەوەی پارتی پێشوازی لە باڵیۆزی رۆمانیا لە عێراق کرد

هێمن هەورامی ئەندامی ئەنجومەنی سەرکردایەتی و بەرپرسی پەیوەندییەکانی دەرەوەی پارتی دیموکراتی کوردستان بە ئامادە بوونی ژمارەیەک لە ئەندامانی مەکتەب پێشوازی لە بەرێز یاکۆب پرادا باڵیۆزی رۆمانیا لە عێراق و شاندی یاوەری کرد.

لە کۆبوونەوەکەدا باس و بەدواچوون بۆ سەردانی ئەم دوایەی وەزیری دەرەوەی رۆمانیا و جێگری پارتی سۆشیال دیموکراتی رۆمانیا بۆ هەرێمی کوردستان کرا.

لە تەوەرێکی تری دیدارەکە هێمن هەورامی باسێکی تێر و تەسەلی سەبارەت بە  دوایین گۆرانکاریەکانی ناوچەکە  پێشکەش بە شاندی میوان کرد و را و بۆچوونی پارتی دیموکراتی کوردستانی سەبارەت بە دوایین پێشهاتەکانی سەر گۆرەپانی عێراق و پەیوەندی نێوان هەرێم و حکومەتی فیدراڵ بۆ شاندی میوان  شی کردەوە و ئاماژەی بە هەڵوێستی پارتی کرد کە دەبێت دەستووری عێراق گەرەنتی پاراستنی دیموکراسی لە عێراق وسەرچاوەی  چارەسەر کردنی کێشەکان بێت لە نێوان هەرێم و بەغداد.

لە لای خۆیەوە بەرێز پرادا باڵیۆزی رۆمانیا لە عێراق خۆشحالی خۆی بۆ سەردانەکە دەربڕی و جەختی لە سەر گرنگی پەیوەنی نێوان گەلی رۆمانیا و کوردستان کردەوە و رۆلی پارتی دیموکراتی کوردستانی لە هەرێمی کوردستان و عێراق و ناوچەکە بەرز نرخاند.