فازل میرانى بۆ قوتابیێن خولا لقێ هه‌شت: پارتى وه‌سیله‌یه‌ بۆ بده‌ستڤه‌ئینانا ئارمانجێن ملله‌تێ كورد

فازل میرانى سكرتێرێ مه‌كته‌با سیاسى یا پارتى سه‌را لقێ 8ێ پارتى ل زاخۆ دا و ب گه‌رمى ژلایێ سه‌ربه‌ست له‌زگین به‌رپرسێ لقێ و كارگێر و ئه‌ندامێن لقێ ڤه‌ هاته‌ پێشوازى كرن و رویشتنه‌ك دگه‌ل به‌رپرس و كارگێرێن لقێ سازكر ل رۆژا 6/11/2012ێ.

ل دیڤدا هه‌ر سكرتێرێ مه‌كته‌با سیاسى سه‌را خولا ره‌وشه‌نبیریا لقێ 8ێ پارتى دا  ئه‌وا هاتیه‌ ڤه‌كرن ژلایێ نڤێسینگه‌ها ره‌وشه‌نبیرى و راگه‌هاندنا لقێ ڤه‌ بۆ (42) كادران بۆ ماوێ (3) هه‌یڤان و دپه‌یڤه‌كێ دا بۆ به‌شداربویێن خولێ دیار كر كو كادرێن پارتى هه‌رده‌م رێ و ئالیه‌تێن پێدڤى و بكارئیناینه‌ بۆ پێگه‌هاندن و بلندكرنا ئاستێ خۆ یێ ره‌وشه‌نبیرى دا كو ئه‌ركێن خۆ ب شێوه‌كێ سه‌ركه‌فتیانه‌ ئه‌نجام بده‌ن و هه‌مى كونگره‌یێن پارتى ژى گرنگى ب ڤێ یه‌كێ دایه‌ كو ئێك ژ دروشمێ كونگره‌یێ (13)ێ نویبوونه‌ڤه‌ بوو .

فازل میرانى سكرتێرێ مه‌كته‌با سیاسى یا پارتى د ته‌وه‌ره‌وه‌كێ ئاخفتنا خۆ دا خۆیاكر كو پارتى نه‌ ئارمانجه‌ به‌لكو وه‌سیله‌یه‌ بۆ ب ده‌ستڤه‌ ئینانا ئارمانجێن ملله‌تێ كورد ئه‌و ژى شادبوون ب مافێن خۆ یێن ره‌وا له‌ورا دووهى كادرێن پارتى خه‌بات كر ئه‌ڤرۆ هنده‌ك خه‌ونێن مه‌ بوونه‌ راستى و فه‌ره‌ هوین ژى ڤێ چه‌ندێ بپارێزن و خه‌باتێ بكه‌ن دا كو ده‌ستكه‌فتیێن مه‌زنتر بۆ نفشێ داهاتى په‌یدابكه‌ن.