هەڵدەكوتنە سەر ماڵان و دزیكردن زیادی كردووە.. داعش چاوپۆشی لێ دەكات
(عیسمەت رەجەب) بەرپرسی لقی چواردەی پارتیی دیموكراتی كوردستان، بە ماڵپەری فەرمیی پارتیی دیموكراتی كوردستانی راگەیاند: "دیاردەی دزیكردن بە شێوەیەكی بەرچاو لە مووسڵ زیادی كردووە كە هەڵدەكوتنە سەر ماڵان و دزییان لێ دەكرێت، بە تایبەت شەوانە، خەڵكیش باس لەوە دەكەن كە تیرۆریستانی داعش دەستیان لەو دزیكردنەدا هەبێت، ئەگەر نا دەیانتوانی رێگری لەو دزیكردنە بكەن و چاوپۆشییان نەدەكرد".
(رەجەب) گوتیشی: "لە ئێستادا وای لێ هاتووە بە تایبەت شەوان خەڵك ترسی هەیە لەوەی دزی لە ماڵەكانیان بكرێت، بۆیە دەرگای ماڵەكانیان دادەخەن و ناوێرن بیكەنەوە، بۆ ئەوەی دزییان لێ نەكرێت".
ئەمەیش لە كاتێكدایە، دیاردەی برسێتی بە رێژەیەكی بەرچاو لە مووسڵ زیادی كردووە و چەندین قەیرانیش بە هۆی دەستبەسەرداگرتنی داعشەوە لەو شارەدا هەیە، وەكو نەبوونی بەنزین و داودەرمان و خۆراك و ئاو و كارەبا، تاوەكو ئێستایش بە دەیان منداڵ لە برسان گیانیان لە دەست داوە.
بڵند ئیبراهیم
