لیژنه‌ی باڵای هاوبه‌شی هه‌ردوو مه‌كته‌بی سیاسی (پ.د.ك) و (ی.ن.ك) كۆبووه‌وه‌

بە پێی بڕیاری کۆبوونەوەیەکی پێشووتری هەردوو مەکتەبی سیاسی پارتی و یەکێتی کە بڕیار درا هەفتانە لە نێوان هەردوو مەکتەبی سیاسییدا کۆبوونەوە بکرێ ،  پێش نیوەڕۆی ئەمڕۆ 5/11/2012 ژمارەیەک لە ئەندامانی لیژنەی باڵای هاوبەشی هەردوولا لە بارەگای مەکتەبی سیاسی پارتی دیموکراتی کوردستان لەهاوینەهەواری سەلاحەدین ، بە سەرپەرشتی بەڕێزان مەلابەختیار و فازڵ میرانی کۆبوونەوە.

بابەتی سەرەکی کۆبوونەوەکە تاووتوێکردن وبەدواداچوون بوو بۆ بڕیارێکی پێشووتری هەردوو مەکتەبی سیاسی ، سەبارەت بە پێداچوونەوەو گەشەپێدانی ڕێکەوتنی ستراتیژی . لەوبارەوە گەڵاڵەی بیروبۆچوون وهێڵە گشتییەکانی هەردوولا لەمەڕ ڕێکەوتنەکە  ئاڵوگۆڕکران ، بەو نیازەی کە هەردوو پەیپەڕی ئامادەکراو ، لەلایەن هەر یەکە لە مەکتەبی سیاسی یەکێتی و پارتی لێکۆڵینەوەیان لەبارەوە بکرێ ،تا لە کۆبوونەوەیەکی داهاتووی  هەردوو مەکتەبی سیاسیدا پڕۆژەیەکی هاوبەشی لێ ئامادەبکرێ و داتریش پەسند بکرێ   .

وێڕای ئەوبابەتە سەرەکییە، بارودۆخی کوردستان وعیراق وناوچەکەش بە شێوەیەکی گشتی بەدواداچوون و خوێندەوەیان بۆ کرا .