کەرکووکی: ترکیە گەهشتیە وێ باوەریێ کو کوردێن ئیراقێ نە گەفە، دڤێ ترکیە ژ کوردان نەترسە

سەرۆکێ تێکەلیێن گشتی یێ پارتیا دەمۆکراتا کوردستانێ(PDK)  و سەرۆکێ پارلەمەنتۆیا هەرێما کوردستانێ یێ بەرێ کەمال کەرکووکی، لگەل نووچەگیهانێ رۆژنامەیا ئاکشام یا ترکی هێلین ئالپ هەڤپەیڤینەک پێکانی و هن بەرسڤ دان پرسان و دیار کر کو، "دڤێ ترکیە ژ کوردان نەترسە و گەر ترکیە پرسا کورد چارەسەر بکە دێ ببە هێزەکە ستراتەژیک ل دەڤەرێ". کەرکووکی ل سەر پرسا د دەربارێ برێز سەرۆکێ هەرێما کوردستانێ مەسعود بارزانی، کو بەشداری کۆنگرەیا بەدەپێ نەبوو و وەها گۆت، "بەلێ برێز بارزانی بەشداری کۆنگرەیا بەدەپێ نەبوو لێ دلێ وی د کۆنگرێ دە بوو. برێز بارزانی دفکرە کو، پرسا کورد ب رێیا دیالۆگ و ئاشتیێ چارەسەر ببە". هەروەها کەرکووکی بالکێشاندە ل سەر پرسا کورد ل ترکیێ و کوردێن رۆژئاڤایێ کوردستانێ دیار کر کو، "گەر ترکیە پرسا کورد چارەسەر بکە دێ ببە هێزا ستراتێژیک ل دەڤەرێ" و بال کشاند کو "کوردێن رۆژئاڤایێ کوردستانێ ژی دێ مافێن خوە بدەست بخن".

کەرکووکی د ئاخفتنا خوە دە گۆت کو، "کوردێن سووریێ ژی ژ بۆ ترکیێ نە گەفن. ل سووریێ یەک گروپ ب تنێ نکارە پرسا کورد کۆنترۆل بکە. ل سەر وێ یەکێ ب تنێ کورد دکارن بریارێ بدن. ئە‌م د ڤێ باوەریێ دە نە کو، گەلێ سووریێ دێ د ڤی شەری دە بسەر بکەڤن. کوردێن ل سووریێ ژی دێ مافێن خوە بدەست بێخن و دێ ب رێیا هلبژارتنان نوونەرێن خوە هلبژێرن. دڤێ ترکیە ژ کوردان نەترسە. نها تێکلیێن مە د ناڤا رێزگرتنێ دە پێشدکەڤە. بەری شەرێ 2003ـیان ترکیە ژ کوردێن ئیراقێ ژی دترسیا. ل دژی کوردان دەردکەت کو دێ کوردێن ئیراقێ چاوا بە. نها تێکلیێن مە یێن لگەل ترکیێ پر باشن. ژ بۆ ترکیێ هەر رێ ڤەکریە. ئەو گەهشتن ڤێ باوەریێ کو، کوردێن ئیراقێ ژ بۆ ترکیێ نە گەفن. ژ بەر ڤێ یەکێ کوردێن سووریێ ژی نابە گەف ژ بۆ ترکیێ."

کەرکووکی د دەربارێ پرسا کوردی یا ل ترکیێ دە ژی گۆت "گەر ترکیە لگەل گەلێ کورد ڤێ پرسێ ب ئاشتیانە چارەسەر بکە، دێ ببە هێزەکە ستراتێژیک، دێ ل دەڤەرێ دۆستێن وێ یێ ستراتێژیک چێبن." د کۆنگرەیا بەدەپێ دە داخوازا ئاشتیێ هەبوو. داخوازا راوەستاندنا خوینێ پرەنسیپەکی ئینسانییە. ژ بۆ چارەسەریێ ژی ل پێش هەر تشتەکی رۆل دکەڤە لسەر ستوویا حکوومەتێ. د وارێ چارەسەریێ دە، پارلەمەنتەرێن کورد یێن بەدەپێ و هەموو جڤاک ژی دکارن ببن ئالیکارێن حکوومەتێ. ترکیە دکارە دلێ هەموو کوردان ب دەست ڤە بینە."

هەوەها کەرکووکی د بەردەواما ئاخافتنا خوە دە گۆت: "ئەم وەک پارتیا دەمۆکراتا کوردستانێ (PDK)، مە هەر دەم ژ بۆ دەمۆکراسیا عێراقێ ژ بۆ کوردستانێ خوەسەری خواستیە. لێ حکوومەتا عێراقێ، ل هەمبەر داخوازێن مە لەشکەر شاندیە و خواستنە پێشمەرگە ژناڤ ببەن. حکوومەتێ دەرفەت، ملیار و ئۆرگانێن چاپەمەنیێ هەبوو. لێ نها ل عێراقێ سستەمەکی فەدەرال هەیە و بارزانی ژی ژ بۆ تو کەسێ خراپ نینە. کوردێن ترکیێ ژی مافێن خوە یێن ئینسانی داخواز دکن و دخوازن ب رێیا دەمۆکراتیک و دوور ژ توندیێ پرس چارەسەر ببن".
هەروەها کەرکووکی د وارێ چارەسەریا پرسا کورد دە بالکێشاندە لسەر ئاک پارتی و وەها گۆت: "حکوومەتا ئاک پارتی، د وارێ چارەسەریا پرسا کورد دە حکوومەتەکی هەری بوێرە. د وارێ پرسا کورد دە، یەکەم پارتیە کو گاڤێن راست و ئەرێنی ئاڤێتنە. ل پێش دە هەبوونا گەلێ کورد دهات حاشایی کرن، ب هاتنا ئە‌ردۆغان ڤە، ئەڤ راستیە هاتە ناسین. ئە‌ردۆغان گاڤێن گەلەک گرنگ ئاڤێتنە لێ دڤێ ئەڤ گاڤ بەردەوام بن".

هەروەها کەرکووکی گۆت: "هەر شەرەک ب ئاشتیێ ب داوی دبە. یا هەری گرنگ ئەوە ئەڤ شەرە ب دیالۆگێ چارەسەر دبە. گەر دیالۆگ ژی دەست پێ بکە، چەک ژی دێ بێدەنگ بن. چاخا ئەم دگەل عەرەبان روونشتین ل سەر مێزێ ژی هەر وسا بوو. ل پێشیێ دیالۆگ دەست پێ کرن، پاشی چەک هاتن دانان. گەر ل ترکیێ ئالیگرێن ڤێ پرسێ ببریار بن ل سەر شەر، ئەم پشتگریا شەر ناکن". 

خەبات- ئیرفان شەمزینی