شاندێكی باڵای پارتی دیموكراتی كوردستان له ره‌وشی ته‌ندروستی سه‌رۆك مام جه‌لال پرسییه‌وه
نیوه‌رۆی ئه‌مرۆ سێ شه‌ممه 18/9/2012سه‌رۆك مام جه‌لال له شاری سلێمانی پێشوازییه‌كی گه‌رمی كرد له وه‌فدێكی باڵای پارتی دیموكراتی كوردستان به سه‌رۆكایه‌تی نێچیرڤان بارزانی جێگری سه‌رۆكی پارتی دیموكراتی كوردستان و سه‌رۆكی حكومه‌تی هه‌رێمی كوردستان و ئه‌ندامێتی فازل میرانی و مه‌سرور بارزانی و ئازاد به‌رواری و مه‌حمود محه‌مه‌د و عیزه‌ددین به‌رواری و زه‌عیم عه‌لی ئه‌ندامانی مه‌كته‌بی سیاسی ، كه به مه‌به‌ستی به‌خێرهێنانه‌وه سه‌ردانی سه‌رۆك تاڵه‌بانی یان كرد .
له سه‌ره‌تای دیدارێكی دۆستانه‌ی گه‌رموگوردا كه كۆسره‌ت ره‌سوڵ عه‌لی جێگری یه‌كه‌می سكرتێری گشتی و ژماره‌یه‌ك له ئه‌ندامانی مه‌كته‌بی سیاسیی یه‌كێتیی نیشتمانی كوردستان ئاماده‌یبوون ، نێچیرڤان بارزانی زۆر به گه‌رمی به‌خێرهاتنه‌وه‌ی له سه‌رۆك مام جه‌لال كرد و خۆشحاڵی خۆیشی ده‌ربری كه جه‌نابیان به ته‌ندروستییه‌كی باشه‌وه له ئه‌ڵمانیاوه گه‌راونه‌ته‌وه و ده‌ستیان به كارو بارو ئه‌ركه مه‌زنه‌كانی سه‌رشانیان كردۆته‌وه .
سه‌رۆك مام جه‌لالیش زۆر به گه‌رمی نێچیرڤان بارزانی و وه‌فده باڵاكه‌ی پارتی دیموكراتی كوردستانی هاوپه‌یمانی به‌خێر هێناو زۆر سوپاسیشكردن بۆ سه‌ردان و هه‌واڵپرسینه‌كه‌یان .
له كۆتایی دیداره‌كه‌شدا سه‌رۆك مام جه‌لال زۆر سوپاسی سه‌رۆك مه‌سعود بارزانی و نێچیرڤان بارزانی و ئه‌ندامانی مه‌كته‌بی سیاسی پارتی دیموكراتی كوردستانی كرد بۆ هه‌واڵپرسین و سه‌ردان و په‌یوه‌ندییه ته‌له‌فۆنییه‌كانیان و ئه‌و سه‌ردانه‌شی به‌رز نرخاندن .
__2021_04_03_h23m18s5__JH.jpg)
