پەیامی پیرۆزبایی مەكتەبی سیاسی پارتی دیموكراتی كوردستان بە بۆنەی هاتنی ساڵی نوێوە

بەبۆنەی ساڵی نوێی زایینەوە پیرۆزبایی گەرم لە گەلی كوردستان و عێراق و ناوچەكەو جیهان دەكەین و هیوادارین ساڵی 2014 ساڵی خێر و خۆشی بێ بۆ هەمووان و كوردستانمان ئارام و پێشكەوتووتر بێ و وەكوو هەمیشە نموونەیەكی زیندووی پێكەوەژیان و لێبووردەیی و پێكەوەكاركردن بێ و ئەو ئاواتانەمان بێنە دی كە لە پێناویاندا ساڵانی زۆر خەباتی هاوبەش و هاوسەنگەریی نەپساوەمان كردووە و قوربانی زۆرمان پێشكەشكردووە.

ئێمە لە پارتی دیموكراتی كوردستان بەڵێنمان بە هاونیشتمانیان و شەهیدانی رێی رزگاری و قوربانیانی ئەنفال و سیاسەتەكانی راگواستن و بەكۆمەڵكوژی و گشت نەتەوە و ئایینزاكانی ئەم وڵاتە داوە كە ساڵانی داهاتوو ساڵانی كاری دامەزراوەیی و هەمەلایەنە بێ بۆ پێشكەشكردنی هەرچی زیاتری خزمەتگوزاری بە هاوڵاتیانی كوردستان و دروستكردنی ژینگەیەكی سیاسی ئارام و لەبار بۆ پێشكەوتن و گەشەكردنی كۆمەڵایەتی و ئابووری و كولتووری و كاركردن لەسەر ئاستی عێراق بۆ پابەندبوونی هەموو لایەنەكان بە دەستوورەوە و جێبەجێكردنی ئەو بڕگەو ماددانەی دیموكراسی و شەراكەتی راستەقینە و سستمی فیدراڵی و سەروەری هەرێمی كوردستان دەچەسپێنن و رێگە لەبەردەم گەڕانەوەی هەموو ناوچە كوردستانییەكانی دەرەوەی هەرێم بۆ قەڵەمڕەوی هەرێمی كوردستان دەكەنەوە. لە پێناو بەدیهێنانی ئەو بەڵێنەشدا لە هیچ ئەرك و بەرپرسیارێتییەك درێغی ناكەین و دەستی هاوكاری دڵسۆزانە بۆ هەموو لایەنە سیاسییەكان و نەتەوە و ئایین و ئایینزاكانی كوردستان درێژ دەكەین. هاوكات لەسەر ئاستی دۆزی رەوای گەلی كوردیشدا درێغی لە هیچ هاوكاری و پشتیوانییەك ناكەین كە بە ئاراستەی چارەسەری ئاشتییانە و بەدیهێنانی مافە رەواكانی كورددا بێ.

دووبارە ساڵی نوێ لە هەموو لایەك پیرۆز دەكەین و كوردستانمان هەمیشە ئاوەدان و پێشەكەوتوو بێ.

 

مەكتەبی سیاسی

پارتی دیموكراتی كوردستان

31/12/2013