مه‌سرور بارزانی پێشوازیا میر ته‌حسین به‌گ میرێ ئێزدیان ل كوردستانێ و جیهانێ كر

پاش نیڤرۆیا ئه‌ڤرۆ رۆژا سێ شه‌مبی رێكه‌فتی 1ی ئه‌یارێ 2012  ل سه‌لاحه‌ددین، رێزدار مه‌سرور بارزانی پێشوازی كر ل میر ته‌حسین به‌گ میرێ ئێزدیان ل جیهانێ و سه‌روكێ جڤاتا روحانیا ئێزدیان.

مه‌سرور بارزانی ب خێرهاتنه‌كا گه‌رم ل میر ته‌حسین به‌گ كر و سوپاسیا هه‌ڵویستێن نیشتیمانی و كورد په‌روه‌رانه‌ یێن میرێ ئێزدیان و ته‌ڤایا ئه‌ندامێن جڤاتا روحانیا ئێزدیان و كوردێن ئێزدی ب گشتی كر كو شیاینه‌ ب گیانه‌كێ ولاتپارێزی ، گرێدای گه‌ل و ولاتێ خۆ بمینن سه‌ره‌رای وان هه‌می فشارێن لێ دهاتنه‌كرن و موركا خۆ یا نه‌ته‌وی پاراستن. هه‌ردلایه‌كێ ڤێ دیدارێ دا مه‌سرور بارزانی ل سه‌ر ره‌وشا ده‌ڤه‌رێن ب زوور ڤه‌قه‌تاندی ژ كوردستانێ ل سنورێ هه‌ردوو پارێزگه‌هێن دهوك و میسل راوه‌ستا ئه‌وێن زووربه‌یا ئاكنجیێن وان ژ كوردێن ئێزدی و پێتڤی و هه‌وجه‌ و چه‌واتیا خزمه‌تكرنا خه‌لكێ وان ده‌ڤه‌را ب ئه‌ركه‌كێ نیشیتیمانێ و گرنگ ل قه‌له‌م دا ، بۆ ڤێ چه‌ندێ ژی هه‌می پشته‌ڤانیا خۆ بۆ  ئێزدیان نیشان دا و هیڤی خاست ئاریشا وان ده‌ڤه‌رانژی ل گۆر میكانیزما د ده‌ستورێ هه‌رده‌میێ عیراقێ دا هاتی و ب مادێ 140 تێته‌ نیاسین بێنه‌ چاره‌سه‌ركرن و خویاكر هه‌رگیروبونه‌ك یان پاشكشه‌كرنه‌ك ژ جێ بجێكرنا به‌ندێن ڤی مادێ ده‌ستوری دێ ره‌وشا سیاسی ل عیراقێ ب گشتی به‌ره‌ف ئاقاره‌كێ خراپڤه‌ به‌ت و بێ گومان هه‌می ملله‌تێ عیراقێ ب كورد و عه‌ره‌بڤه‌ دێ دزه‌ره‌رمه‌ندبن.

ل داویا سه‌ره‌دانێ دا میرێ ئێزدیان خۆشحالیا خۆ ب دیدارا به‌رێز مه‌سرور بارزانی ده‌ربری و پشته‌ڤانیا میرێ ئێزدیان و جڤاتا روحانی و هه‌می كوردێن ئێزدی بۆ سه‌روك بارزانی و په‌رله‌مان و حكومه‌تا هه‌رێمێ نیشاندا و گوت ب ڕه‌فتار و كریار مه‌ بۆ هه‌می خه‌لكێ خویاكریه‌ كۆ ئێزدی پشكه‌كا هه‌ره‌گرنگ و نه‌دابڕاینه‌ ژ ملله‌تێ كورد و ئه‌ڤرۆژی ژ هه‌رده‌مه‌كێ دیتر پتر ئه‌و گرێدای گه‌ل و ولاتێ خۆنه‌.